Әкім жер-көкке сыйғызбай мақтаған инвестициялық жоба сол күйі іске қосылмады

Жарияланды
Павлодарда осыдан екі жыл бұрын ашылған зауыт әлі өнім өндірген жоқ

Қаржы тапшылығы салдарынан, ол сол күйі жабылып тынар еді, егер орайы келіп, шетелдік инвестордың табыла кеткені болмаса.

2017 жылғы желтоқсан айында «Alef trade» ЖШС Екібастұз қаласына қарасты Шідерті кентінде қысқы дизельді отын шығаратын зауытты іске қосты. Сол тұста бизнес пен билік «бұл елімізде теңдесі жоқ кәсіпорын», «Павлодарда ғана қыста қатпайтын жанармай өндіріледі» деп, жалпақ жұртқа жария салғаны есімізде. Өндіріс орнының салтанатты ашылу рәсіміне қатысқан Павлодар облысның әкімі Болат Бақауов жаңа зауыттың экономикаға да, қарапайым халыққа да пайдасы мол болатынын көсіле баяндаған еді. 

«Аймағымызға аязды ауа райы тән. Қазан мен қараша айларынан бастап, күннің күрт суытуы ғажап емес. Температура -20 градустан төмендесе болғаны, құрамында парафині бар дизельді отын қатып, қоймалжыңға айналады.  Салдарынан, жүргізушілер мен жолаушыларға, бірқатар өндіріс орнына қиындық тудырады. Ал жаңа кәсіпорын қысқы дизельді отын шығару арқылы мұндай түйткілді болдырмауы тиіс. Сондықтан, бұл өндіріс өңіріміз үшін аса қажет», – деген аймақ басшысы Болат Бақауов

Алайда, арада екі жылға жуық уақыт өтсе де павлодарлық кәсіпорында бірде-бір литр қысқы дизельді отын шығарылған жоқ. «Alef trade» ЖШС директоры Қайыргелді Ғалиев жоспарлы істің жүзеге аспауына қаржының болмауы себеп екенін алға тартты. 

«Жобаның жалпы құны – 1 млрд 772 млн теңге. Бұл соманың 500 млн теңгесі – жеке инвестиция, қалған 1 млрд 272 млн теңгені екінші деңгейлі банктен несиеге алдық. Қаржының бір бөлігі құрал-жабдықтарды сатып алуға, екінші бөлігі құрылыс-монтаждау жұмыстарына жұмсалды. Өндірісті іске қосу үшін тағы 314 млн теңге керек болып, «Сбербанкке» өтініш бердік. Банк өтінішімізді 1 жылға жуық уақыт қарап, былтыр тың бағыттағы жобаларды қаржыландырмайтынын айтты. Сондықтан, қаражат болмай, ісіміз тұралап қалды», – дейді Қайырлы Ғалиев. 

Былтыр Екібастұз қаласының әкімдігі қолдау білдіріп, жобаны әрі қарай «Павлодар» әлеуметтік-кәсіпкерлік корпорациясы арқылы қаржыландыруға тырысып көрген-ді. Бірақ бұл істен де түк шықпады. Әйтеуір, биыл кәсіпкердің өзі әупірімдеп жүріп, шетелдік инвестор тауып, жұмысты қайта жалғастырды. 

«Екінші деңгейлі банктен де, әкімдіктен де қаржылай қолдау болмағандықтан, өзге мемлекеттің инвесторларын тартуға тура келді. Шетелдік кәсіпкер жобамыздың жүзеге асуына 180 млн теңге берді. Осы қаржыға құрылыс жұмыстарын аяқтадық. Енді жылдың соңына дейін зауытты іске қосуды жоспарлап отырмыз», – дейді кәсіпорын басшысы. 

Сөйтіп, келесі жылдан бастап Шідертідегі кәсіпорын айына 4 тонна, жылына 30 тоннаға дейін қатпайтын жанармай өндірмек. 
Ресми деректерге сүйенсек, еліміз жылына 120 мың тонна қысқы дизельді отынды пайдаланады. Демек, павлодарлық зауыт сұраныстың төрттен бір бөлігін өтеуге қауқарлы болмақ. Бұл ретте, алдымен, облыс аумағындағы «Бозшакөл» кен-байыту комбинатын, «Богатырь-Көмір»,

«Майкөбен-Инвест» кәсіпорындарын қамтамасыз етуді жоспарлап отыр. 
Жанармайдың бұл түрі қақаған суықта ғана пайдалануға арналғанымен, павлодарлық зауыт жыл он екі ай бойы үздіксіз жұмыс істеуге ниетті. Атап айтқанда, дизельді отыннан бөлек АИ-92 маркалы жанармайдың 1200 тоннасын өндіру де ойда бар. Ал кейін, Еуро-5 стандарттарына сай келетін өнім шығаруды да қолға алмақ. 
 

Сондай-ақ оқыңыз