ШҚО шенеуніктері кең кабинеттерін босатып жатыр

Жарияланды
Осы оңтайландыру нәтижесінде облыстық бюджет 7 миллион теңгеден аса қаржы үнемдемек

Мемлекеттік органдардың тиімсіз шығынын қысқарту үрдісі Шығыс Қазақстан облысында баяу жүріп жатыр. Мемлекеттік қызмет істері және сыбайлас жемқорлыққа қарсы күрес агенттігінің аймақтағы өкілдері екінші мәрте ескерткеннен кейін ғана, әкімдіктің басқарма басшылары кең кабинеттерін босатып, шағын бөлмеге көшуге келісті. 

Бұны шығарған біз емес… 

Жергілікті атқарушы орган басшылары артығымен иеленіп отырған кабинеттерді оңтайландыру  – ел президентінің былтыр күзде берген тапсырмасы.                                                                                                                                                                                                                                                                                                                                                                                           
Шығыс Қазақстан облысы бойынша 281 кабинетті тексеру нәтижесінде тиісті норманың сақталмағаны анықталған: 22 мың шаршы метрдің 4 мыңын қысқарту қажет. Босаған бөлмелер әуелде басқа мемлекеттік органдарға немесе жалға беріледі деп жоспарланған. 

2019 жылдың ақпанында, Мемлекеттік қызмет істері және сыбайлас жемқорлықа қарсы күрес агенттігі облыстық департаменті берген алғашқы ескертуден кейін де Елбасының тапсырмасы біздің аймақта орындалмай жатты. Мемлекеттік органдардың ешқайсысы жоғарыдағы талапқа мойынсұнғысы келмей, бұл мәселе мемлекеттік қызметкер жөніндегі кеңесте бірнеше рет талқыға салынды. 

Тек 2 ай өткен соң сең орнынан қозғалғандай болды. Мемлекеттік қызмет істері және сыбайлас жемқорлыққа қарсы күрес агенттігі ШҚО департаменті жетекшісінің орынбасары Қайрат Сапарғалиев берген ақпарат бойынша, мекеме басшылары 4 мың шаршы метрді артығымен пайдаланса, әкімдік қызметкерлерінің кабинеттері жалпы нормативтен 9 мың шаршы метрге асып кеткен. Әсіресе Семей қаласындағы мемлекеттік мекемелердің кабинеттері тым кең екен. Айталық, мекеме басшылары 830 шаршы метр аумақты артығымен пайдаланса, қызметкерлердікі 1,8 мың шаршы метрден асып кеткен.
 
«Қазіргі кезде кейбір мемлекеттік органдардағы жағдай жақсарғанын байқаймыз. Айталық, Өскемен қалалық білім басқармасының кабинетіне бөлімнің 7 қызметкері көшірілді. Тұрғын үй коммуналдық шаруашылық бөлімі басшысының 2 орынбасары жалпы аумағы 22 шаршы метр болатын бір кабинетте отыр. Босаған бөлмелер конференц-залға айналған. Ал облыстық ішкі саясат басқармасы басшысының кабинетіне open space принципі бойынша бөлім басшылары мен 2 штаттан тыс қызметкер көшірілді, – дейді Қайрат Сапарғалиев. 

Жүргізілген жұмыс нәтижесінде Семей қаласы әкімдігіне Достоевский 110 мекен-жайындағы ғимаратты босату ұсынылған, ол өз кезегінде бұндай ғимаратты ұстау шығынын 5 миллионға дейін азайтуға мүмкіндік береді. Сондай-ақ қала әкімі Ермак Салимовтың да кабинетін қысқарту ұсынылған. Оны әкімдік қызметкерлері ашық форматтағы кеңсе ретінде пайдаланады. 

Ал Бесқарағай ауданында әр жерде отырған 6 бөлімді біріктірген, енді олар мемлекеттік қызметті бір жерде отырып көрсетеді. Ал осы кабинеттерді ұстауға кеткен шығынды қысқарту есебінен бюджеттің 2 миллион теңгесі үнемделеді.

Осындай оңтайландыру нәтижесінде үнемделген қаржы 7 миллион теңгені құрайды деп жоспарланған. Кейін бүкіл жалға алу келісім-шарттарын рәсімдеу шаралары аяқталған соң, бұл сома көбейеді деп күтілуде. Ал қызметкерлер көшкен немесе конференц-залға айналған бөлмелер ешқандай экономикалық әсер бермейді. 

«Ұсыныстарды жүзеге асыру барысында жергілікті деңгейдегі биліктің өзгеріске дайын еместігін байқадық. Әкімдер мен аппарат басшылары кең кабинеттерінен, демалыс және қабылдау бөлмелерінен бас тартқысы жоқ.  Бұған мысал ретінде аудан орталығы тұрғындарының атынан келіп түскен шағымды айтсақ болар, олар оңтайландыру жүріп жатқанына қарамастан, аудан әкімі өзіне демалыс бөлмесін жасап алғанын жазады. Бұл мәселе бойынша аудан әкімі ескерту алып, ол бәрін талапқа сай ретке келтіретін болады», – дейді департамент өкілі.

Басшысың ба, халқыңа жақынсың ба? 

Оңтайландыру жобасына, форматы біршама өзгеше болса-дағы, білім беру мен денсаулық сақтау мекемелерін жаңғырту мәселесі де кіреді. Мектептер үшін жаңа талап: директордың кабинеті бірінші қабатта орналасуы керек, ал ауруханалар үшін – бірнеше мекемені бір ғимаратқа орналастыру талабы қойылған. 

Қайрат Сапарғалиев келтірген деректер бойынша, облыстағы 655 мектептің 255-де мектеп директорының кабинеті екінші не одан да жоғары қабатта орналасқан. Оны 1-қабатқа түсіру мүмкіндігі тек 140 мектепте бар екен. Бұл жұмыс жаңа оқу жылы басталғанша бітуі тиіс.
 
Ал денсаулық сақтау саласында 10 медициналық мекемені біріктіру көзделген. Әзірге жалпы тізімнен тек 4 мекеме біріккен: Семейдегі медициналық статистика бюросы №1 Семей қалалық емханасымен біріксе, облыстық Ана мен бала орталығы Өскемен қалалық балалар тағамы комбинатымен қосылған. 

Қысқарту ма, жабу ма? 

Айта кету керек, оңтайландырудың барлығы күтілген нәтиже берген жоқ. Мәселен Балалар тағамы комбинаты Ана мен бала облыстық орталығымен өткен жылдың сәуір айында біріктірілген еді, ол іс жүзінде комбинаттың жабылуына әкеп соқты. Егер бұрын 1 жасқа дейінгі баласы бар ата-аналар комбинаттан қолдан қоректендіруге арналған «Биолакт» сүт өнімін ала алса, оңтайландырудан кейін оларға дәріханада сатылатын құрғақ сүт қоспасына көшуді ұсынған. Бұрынғы сүт асханасы босатқан тұрғын-жай бір жыл бойы ешкімге жалға берілмей, бос тұр.
  
Тағы бір мысал – Өскемен қалалық сәулет және қала құрылысы бөлімі басшысының шағын кабинетке көшуі. Бас сәулетшіні аумағы 45 шаршы метрлік кабинеттен көрші 21 шаршы метрлік шағын кабинетке көшірген еді. Ал босаған кабинетті Қайрат Сапарғалиевтің айтуынша, жалға беру жоспарланған. 
 
«Департамент айтқан ескертпені орындап, бірден басқа кабинетке көштім. Бұл мен үшін бас ауыртатын нәрсе емес. Мәселе басқада, басқа бақылаушы органның талаптары бойынша, ғимараттың ішіндегі бір бөлмені бөтен компанияларға жалға бере алмаймыз», – дейді Өскемен қалалық сәулет және қала құрылысы бөлімінің басшысы Дәурен Қасымов.

Сондықтан бас сәулетшінің кабинеті әзірге жабық тұр.

Сондай-ақ оқыңыз