Павлодарда шыбын-шіркеймен күреске биыл 602 млн теңге бөлінді

Бұл мәселе бірнеше жыл бойы күн тәртібінен түспей келеді

Фото: автордікі

Облыс аумағында қансорғыштардың санын азайту мәселесі соңғы бірнеше жыл бойы өткір тұр. 

Ертіс өзенінің бойындағы Павлодар облысының жұртшылығы үшін маса – мазаны алатын басты мәселе. Себебі, мамыр айы келсе болғаны шыбын-шіркейдің саны күрт артып, кей тұрғындар далаға шығудан қалады. Тіпті, осыдан бірнеше жыл бұрын сол масаның салдарынан ауылдардағы үй құстың қырылып қалғаны бар. Осының барлығын ескере келе, жергілікті билік қансорғыштармен күреске ден қойып келеді. Қыс кезінде-ақ химиялық, биологиялық өңдеу жұмыстарына қатысты мемлекеттік конкурстар жариялап, бұл мақсатқа мемлекеттік қазынадан қомақты қаржы қарастырылады.

 Айталық, 2017 жылы шыбын-шіркейді азайту үшін жергілікті бюджеттен 595 млн теңге бөлінді. Ал 2018-2019 жылдары қаржы көлемі 602 млн теңгеге дейін өсті. Биыл да дәл осындай сома жұмсалмақ.

Павлодар облыстық энергетика және тұрғын үй-коммуналдық шаруашылық басқармасының бөлім басшысы Нұржан Алдыбаевтың айтуынша, бұл қаржыға аймаққа қарасты 3 қала мен 7 ауданды өңдеуге қажет химиялық және биологиялық препараттар сатып алынады. Оған қоса, әр аудан-қаланың жергілікті бюджетінен қарастырылған қаражат бар. Қаңтар айында қажетті препараттарды сатып алуға жарияланған мемлекеттік конкурстың нәтижесі әзірше белгісіз. Соған қарамастан, шенеуніктер тиісті жұмыстардың барлығы уақыты аяқталарына сенімді. 

«Наурыз айында келісімшарт жасап, сәуір айының соңында дезинсекциялық жұмыстарға кірісеміз. Осылайша, шыбын-шіркейдің кең таралмауының алдын аламыз», - дейді Нұржан Алдыбаев. 

Айта кетелік, өткен жылы барлығы 200 мың литр биологиялық және 4 мың литр химиялық бактицид сатып алынған болатын. Яғни, препараттың әр литріне мемлекеттік қазынадан 2,5 мың теңге төленді. 
Сонымен қатар, биыл алғаш рет өңдеу жұмыстары барысында шағын габаритті авиация қолданылмақ. 

«Бұған дейін шыбын-шіркеймен күрес шаралары кезінде пайдаланылған аспалы бүріккіш, баржа, қайық пен ұшақтардың қатарына биыл дельталеттер қосылады. УАН-2 маркалы аппараттар жоғары биіктікте жұмыс істеуге қауқарлы. Сәйкесінше, өңделетін аумақты анағұрлым көп көлемде қамтиды», - дейді Нұржан Алдыбаев. 

Осы және өзге де құралдардың көмегімен биологиялық, химиялық өңдеу шаралары жерде, Ертіс өзенінде және ауада жүргізіледі. 
 

«Курсивті» кез келген жерде оқыңыз. Бизнес әлеміндегі ең өзекті жаңалықтар Facebook, Telegram және Яндекс.Дзен-де.

banner_wsj.gif

 

Қазақстан қай елден қандай гуманитарлық көмек алды?

2020 жылы Қазақстанның өзі құны 2,5 млн доллар болатын арнайы жүк жіберген

Фото: Офелия Жакаева

Мемлекеттік кірістер комитетінің гуманитарлық көмек ретінде жеткізілген жүк туралы мәліметінен Қазақстанның жарты жыл ішінде өзге елдерден құны 250,9 мың доллар  0,41 тонна дәрі-дәрмек алғанын байқауға болады. Салыстырар болсақ, 2019 жылы жалпы құны  $3,9 млн болатын 1,3 тонна дәрі жеткізілген. 

Сонымен қатар, кеден статистикасының «Киім-кешек және аяқ киім» бөлігінде көрсетілген гуманитарлық көмектік құны қатты өскен. Былтыр келген тауардың құны  $653 мың болса, биыл 6 айдың ішінде еліміз 2,9 млн доллар  тұратын киім-кешекті гуманитарлық көмек ретінде алып үлгерген. Ал салмақ бойынша салыстырсақ, биыл келген жүктің салмағы төмен. (биыл – 84 тонна, былтыр – 239 тонна). 

Қаржы министрлігінің мемлекеттік кірістер департаменті «Киім-кешек және аяқ қиім» бөлігіне биыл коронавируспен күресте алдыңғы шепте жүрген дәрігерлердің арнайы киімі кіргенін айтады. Қорғаныш киім тиелген ең үлкен гуманитарлық көмекті Қазақстанға Катар елі жіберген. Олар жалпы құны 1,6 млн доллар болатын 35 мыңнан аса арнайы қорғаныш киімдерін берген. 

Жалпы, осы жарты жылда  Қазақстанға жіберілген гуманитарлық көмек көлемі бойынша да Катар көш бастап тұр ($1 млн 719 мың). Ал екінші орында – Қытай ($838,5 мың), үшінші орында  Германия ($732 мың) келеді.

2020 жылдың алты айында республикаға құны 4,013 млн доллар гуманитарлық көмек келген. Салыстыру үшін айтар болсақ, 2019 жылдың жалпы көрсеткіші $9,873 млн құрайды. Былтыр Қазақстанға гуманитарлық көмек жібергендердің көш басында Германия болған, бұл ел $8,2 млн тұратын көмекті тегін жіберген. 

Қазақстан кімге көмек беріп жатыр?

Қазақстанның өзі биыл екі елге гуманитарлық көмек жіберген екен. Жалпы құны – $2,5 млн. Соның басым бөлігін ұн түрінде Тәжікстан алған. Бұл елге 1 млн 572 мың доллардың ұны гуманитарлық көмек ретінде жіберілген. Оған қоса, Денсаулық сақтау министрлігі жыл соңына дейін осы елге өкпені жасанды желдету шағын аппараттарының бір партиясын жіберуді жоспарлап қойған. Әзірге Ақмола облысында орналасқан отандық өндіруші өндіріс қарқынын арттырып болғанша, Қазақстан көршілеріне азық-түлікпен көмектесе тұрады. 

Биыл Ауғанстанға 2 мың тоннаға жуық азық-түлік: ұн, макарон өнімдері,  сүйық май мен қою сүт жіберілген. Оның жалпы құны  – $941,7  мың. Былтыр Қазақстаннан гуманитарлық көмек алғандардың арасында Ауғанстан жоқ, ал Тәжікстанға сол 5 мың тонна ұн жіберілген. Алайда ол  кезде жіберілген ұнның құны  $1 млн 269 мың болған. 

2 полоса_Гуманитарная помощь-01.jpg

 

«Курсивті» кез келген жерде оқыңыз. Бизнес әлеміндегі ең өзекті жаңалықтар Facebook, Telegram және Яндекс.Дзен-де.

banner_wsj.gif

 

#Қазақстандағы коронавирус

Читайте нас в TELEGRAM | https://t.me/kursivkz

Читайте свежий номер

kursiv_uz_banner_240x400.jpg