Skip to main content

Мырзашоқыдағы маусым ашылды

Баянауылдағы тау-шаңғы кешеніне күніне 1500-2000 адам келеді.

Баянауыл баурайындағы Мырзашоқы тау-шаңғы кешені биыл екінші туристік маусымды бастады. Былтыр мұнда Нұр-Сұлтан қаласы мен Павлодар, Қарағанды облыстарынан 5 мыңнан астам турист келген-ді. 

Курортық аймақты сенімді басқаруға алған «Мырзашоқы-Қаражар» жауапкершілігі шектеулі серіктестігі осы жылы демалушылар саны көбейеді деген сенімде. 

«Кешенді өткен жылдың маусым айында басқаруға алдық. Сол уақыттан бері 35 млн теңге қаржы құйдық. Биыл сервистік қызметті жақсарту мақсатында 70 млн теңге жұмсамақпыз. Қаңтар айының соңына дейін қосымша 100 шаңғы, 70 сноуборд, тюбингтер аламыз. Ал жазда  қонақ үйлер, дәмханалар салу ойда бар. Жалпы, Мырзашоқы кешенін тек қысқы емес, жазғы туризмнің де ортасына айналдыруды көздеп отырмыз», - дейді кешеннің меңгерушісі Орынбай Өскенбаев

Атап өтерлігі, мұнда шаңғы, сноуборд, тюбинг, сырғанауға қажетті арнайы киімдер – барлығы тегін беріледі. Тек жалпы ұзындығы 1050 метр болатын, 800 метр биіктікке дейін көтерілетін аспалы жолға отыру үшін ересектер 500 теңге, 18 жасқа дейінгілер 250 теңге төлейді. Ал 10 жасқа дейінгі балалар үшін аспалы жол да тегін. 

«Біз өткен жылы Мырзашоқыға алғаш рет келген едік. Араға бір жыл салып келгенімізде, оң өзгерістерді байқадық. Сервис айтарлықтай жақсарыпты. Балалар үшін тюбингпен сырғанау, аспалы жолмен серуендеу қызық. Үлкен ұлым екеуіміз шаңғымен, сноубордпен жоғарыдан түскенді ұнатамыз. Ендігі ретте, демалыс, тамақтану, жылыну орындары көптеп ашылса, жақсы болар еді. Себебі, қазіргідей бірнеше сағатқа қана емес, бірнеше күнге келетін мүмкіндік туады», -  дейді Екібастұз қаласының тұрғыны Қайрат Ахметов. 

Мырзашоқының туристік әлеуетінің артып, қызмет көрсету орындарының салынуына тау-шаңғы кешеніне дейін су құбырының тартылмауы қолбайлау болып отыр. Жасанды қар жасайтын техника да судың болмауы салдарынан іске қосылмай тұр. Бірақ Баянауыл ауданының әкімі Қанат Кәрімов бұл мәселе таяу уақытта шешілетінін айтты. 

«Биыл Қаражар ауылына таза ауызсу тарту мақсатында бюджеттен 268 млн. теңге бөлу қарастырылды. Су құбырлары салынған соң, елді мекеннен тау-шаңғы кешеніне дейін 1,8 шақырым құбыр тартамыз. Сөйтіп, Мырзашоқы сумен толықтай қамтылады», - деп сендірді Қанат Кәрімов.
 

banner_wsj.gif

Бөтен адамға цифрлы қолтаңба алдырам деп, алаяқтарға алданып қалмаңыз

"Азаматтарға арналған үкімет" жеке деректерді бейтаныс адамдарға беруге болмайтынын ескертеді

Фото: shutterstock.com

Қалай қырық екі мың теңге туралы әңгіме шықты, солай әлеуметтік желілерде азаматтардың жеке мәліметтерін сұрату арқылы ЭЦҚ (ЭЦП) алуға көмектесемін хабарламалар қаптап кетті. Осындай пысықайлар қазіргі қиын кезді пайдаланып, төтенше жағдай кезінде табысынан айырылғандардан ЖСН, ЭЦҚ, банк картасының нөмірін, тіпті оның пин-кодын сұрай отырып, әлеуметтік жәрдемақыны рәсімдеп беру қызметін көрсетуді ұсынып отыр. 

Ал «Азаматтарға арналған үкімет»  қазақстандықтарды мұндай қызметтерге жүгінбей, одан бас тартуын сұрайды.

«Жеке мәліметтерді, соның ішінде ЭЦҚ-ны бөтен адамдарға беру арқылы азаматтар өздерінің жеке деректері мен мүлкіне қауіп төндіретінін түсінуі керек. Оған қоса, бұл төлем азаматтардың шотынан өздерінің «қолғабыс етуімен» ұрлануы мүмкін», – дейді мекеменің баспасөз қызметі. 

Электрондық цифрлық қолтаңба мен оның құпиясөзін алған алаяқтар азаматтың egov.kz-тегі барлық жеке мәліметіне қол жеткізе алады. Оған қоса, олар жалған келісім жасау үшін  оның атына кәсіпкерлік ашып, баспанасына бейтаныс тұлғаларды тіркеп, тіптен көлігін өзге адамның атына шығара алады. Ал банк картасының ПИН-кодын  алғаннан кейін алаяқтар ондағы барлық қаражатты шешіп алуы мүмкін.

Азаматтарға арналған үкімет қазақстандықтардың онлайн түрдегі мемлекеттік қызметтердің барлық мәселесі бойынша,  соның ішінде ЭЦҚ мен жаңа әлеуметтік төлем түрі бойынша ақысыз түрде және еш қауіпсіз 1414 бірыңғай байланыс орталығынан көмек ала алатындығын хабарлайды. Қоңырау шалу тегін. Қазіргі уақытта оның жұмысына халыққа қызмет көрсету орталықтарының 1800-ден астам қызметкері тартылған. 

Сонымен қатар Facebook әлеуметтік желісінде «eGov помощь» тобы құрылды, онда қарапайым желі қолданушылары, IT-мамандар және халыққа қызмет көрсету орталықтарының қызметкерлерінен тұратын бірқатар ерікті жиналды. Олардың барлығы  egov.kz порталының белсенді қолданушылары, олар мемлекеттік қызметтерді үйден шықпай-ақ алады және елімізде орын алған қиын сәтте өзге азаматтарға электрондық үкімет порталын пайдалануды үйретуге дайын. Сондай-ақ еріктілер азаматтардан еш жеке деректерін талап етпейді, тек сұрақтарына жауап беріп, пайдалы кеңестер беру арқылы мемлекеттік қызметті алуға көмектеседі.

Егер азамат ескертуімізге қарамастан, ақылы түрде күмәнді «көмекшілердің» қызметтерін пайдаланып үлгерсе және жеке мәліметтерін берсе, Азаматтарға арналған үкімет оларға ЭЦҚ-ның құпиясөзін pki.gov.kz-тегі жеке кабинеті арқылы өзгертуді немесе кілттердің күшін жоюды ұсынады.
 

banner_wsj.gif

drweb_ESS_kursiv.gif