Қазақстан мен Жапония бірлесіп түсірген фильм Шанхай кинофестиваліне қатысады

Екі ел бірлесіп түсірген кино «Уақыт жолдары» деп аталады

Фото: Шәкен Айманов атындағы «Қазақфильм» акционерлік қоғамы

Режиссерлері Ерлан Нұрмұхамбетов (Қазақстан) және Лиза Такэбаның (Жапония) «Уақыт жолдары» («Конокрады. Дороги времени») фильмі 23-ші Халықаралық Шанхай кинофестивалінің (SIFF) аясында көрсетіледі. Бұл туралы Шәкен Айманов атындағы «Қазақфильм» акционерлік қоғамы хабарлады.

Коронавирус пандемиясына байланысты кейінге шегерілген Қытайдың ең үлкен кинобайкауы –Халықаралық Шанхай кинофестивалі шілденің 25-і мен тамыздың 2-і аралығында өтеді. Бұл туралы фестивальдің ресми сайтында жарияланған.

Байқаудың ұйымдастырушылары биыл фестиваль онлайн және оффлайн форматында өтетінін, сондай-ақ, COVID-19 індетінің алдын алу шараларын сақтау қатаң бақылауда болатынын хабарлады. Іс-шараға қатысушылар үшін кинотеатрлар мен ашық аспан астындағы кино көрсетілімдер, онлайн-көрсетілімдер, SIFFFORUM кинематографиялық форумы, креативті-инвестициялық киножобалардың тұсаукесері ұйымдастырылады. Ал «Белбеу және Жол» кино апталығы шеңберінде Қазақстан мен Жапония бірлесіп түсірген «Уақыт жолдары» фильмі көрсетілетін болады. 

Айта кету керек, осы бағдарлама аясында «Уақыт жолдары»  фильмінен бөлек АҚШ, Мысыр, Ұлыбритания, Греция, Үндістан, Венгрия, Түркия, Қытай, Германия және басқа да елдерден 15 картина ұсынылады.

Қала кинотертрларындағы көрсетілім кестесі SIFF сайтында жарияланған, ал онлайн платформадағы билеттердің сатылымы 20 шілдеден басталады.

Естеріңізге салайық, «Уақыт жолдары» фильмін Қазақстан мен Жапония бірлесіп түсірген. Қазақстан тарапынан ҚР Мәдениет және спорт министрлігінің тапсырысымен Ш.Айманов атындағы «Қазақфильм» киностудиясы жұмыс істесе, жапон тарапынан – «Tokyo New Cinema» компаниясы қолға алған. 

Фильмде тыныш өмірінің шырқын бұзып, барымташылар отағасын аяусыз өлтірген отбасы туралы баяндалады. Марқұмның 12-жасар баласы Олжас, барымташылардың қолынан мерт болған әкесінің өліміне қайғырып, зұлымдықпен күресіп, отбасыларына түскен ауыртпалықты қарындастарымен бірге кешеді. Қорғансыз қалған Олжастың отбасына ғайыптан пайда болған бөгде біреу қол ұшын созады.

Фильмде басты рөлдерді Канн кинофестивалінде үздік актриса атанған, Алтын пальма бұтағының иегері Самал Еслямова, танымал қазақстандық актер Дулыға Ақмолда сомдайды. Олжастың рөлін Мәди Менайдаров есімді жас актер ойнайды. Басты рөлдердің біріне жапондық актер Мирай Морияма шақырылған.

Халықаралық Шанхай кинофестивальі 1993 жылдан бастап өтеді. 27 жыл ішінде бұл шара Қытай киноиндустриясының дамуының куәсі болды және мәдени пікір алмасу мен ынтымақтастықтың халықаралық алаңына айналып үлгерді.

«Курсивті» кез келген жерде оқыңыз. Бизнес әлеміндегі ең өзекті жаңалықтар Facebook, Telegram және Яндекс.Дзен-де.

banner_wsj.gif

 

Әлеуметтік маңызы бар 24 қызметке қалай онлайн тапсырыс беруге болады?

Қажетті құжаттарды үйден шықпай-ақ алыңыз

Фото: Shutterstock

Соңғы уақытта көпшілік eGov.kz порталын жиі пайдалана бастады. Порталды тек қана 42 500 теңгеге өтініш беру үшін ғана емес, басқа да қызметтері үшін жиі қолдануға мүмкіндік бар. 

    Көбіміз біле бермейтін, білсек те мән бермейтін қызметтер «Азаматтарға арналған үкімет» порталында самсап тұрғанын ескеру керек. Бір емес, 24 қызмет түрін үйде отырып-ақ рәсімдеуге болады. Аталған 24 қызметтің барлығы дерлік еңбек және халықты әлеуметтік қорғау министрлігінің әлеуметтік көмек көрсету жобалары. 

    Қызмет түрін алу үшін алдымен порталға авторизация жасау қажет. Яғни, өзіңіздің жеке ЭЦҚ кілтіңізді ашасыз. Оны қалай ашу керегін мына сілтемеге өтіп түсініп алсаңыз болады. Одан кейін басты бетте орналасқан «Электронды өтініштер» сервисін таңдап, әрі қарай қызметке тапсырыс бересіз. «Онлайн сұрау» сервисін таңдаған соң «құру» батырмасын басасыз. Одан әрі жаңа терезе ашылып, сол жерден «мемлекеттік көрсетілетін қызметтің атауы» бағанында қажетті көрсетілетін қызметті таңдап, бағандарды толтырып шығасыз. Кейін сол қызметке жауапты болып саналатын мемлекеттік органды белгілейсіз. Содан соң тиісті құжаттарды бірге тіркеп, өтінімге ЭЦҚ арқылы қол қойып, жолдайсыз. 

    «Электронды өтініштер» сервисі көмегімен мына қызметтерді онлайн алуға болады: 

•    Мүгедектерде протездік-ортопедиялық көмек ұсыну үшін оларға құжаттарды рәсімдеу; 
•    Мүгедектерді сурдо-тифлотехникалық және міндетті гигиеналық құралдармен қамтамасыз ету; 
•    Жүріп-тұруы қиын бірінші топтағы мүгедектерге жеке көмекшінің және есту кемістігі бар мүгедектерге ымдау тілі маманының қызметтерін ұсыну үшін мүгедектерге құжаттарды рәсімдеу; 
•    Мүгедек баланы тәрбиелеп отырған анаға немесе әкеге, бала асырап алушыға, қорғаншыға жәрдемақы тағайындау; 
•    Бала кезінен бірінші топтағы мүгедектің күтіміне байланысты жәрдемақы тағайындау; 
•    Өз бетінше жұмысқа орналасуы үшін шетелдікке немесе азаматтығы жоқ адамға біліктілігінің сәйкестігі туралы анықтама беру немесе ұзарту; 
•    Жасына байланысты зейнетақы төлемдерін тағайындау; 
•    Мемлекеттік базалық зейнетақы төлемдерін тағайындау; 
•    Мемлекеттік арнайы жәрдемақылар тағайындау; 
•    Мемлекеттік атаулы әлеуметтік көмек тағайындау; 
•    Арнаулы мемлекеттік жәрдемақы тағайындау; 
•    Жергілікті өкілді органдардың шешімдері бойынша мұқтаж азаматтардың жекелеген санаттарына әлеуметтік көмек тағайындау; 
•    Семей ядролық сынақ полигонында ядролық сынақтардың салдарынан зардап шеккен азаматтарды тіркеу, біржолғы мемлекеттік ақшалай өтемақы төлеу, куәлік беру; 
•    Банкроттық салдарынан таратылған заңды тұлғалар қызметкерлердің өмірі мен денсаулығына зиян келтірген зиянды өтеу жөніндегі төлемдерді капиталдандыру кезеңі аяқталғаннан кейін ҚР азаматтарына ай сайынғы төлемдер түрінде әлеуметтік көмекті тағайындау; 
•    Ақталған адамға куәлік беру; 
•    Мүгедектігі және /немесе еңбек ету қабілетінен айырылу дәрежесін белгілеу және /немесе қажетті әлеуметтік қорғау шараларын айқындау; 
•    Медициналық-әлеуметтік мекемелерде (ұйымдарда) арнаулы әлеуметтік қызмет көрсетуге құжаттарды рәсімдеу; 
•    «Бастау Бизнес» жобасы бойынша кәсіпкерлік негіздеріне оқыту; 
•    Көпбалалы отбасыларға мемлекеттік жәрдемақы тағайындау; 
•    Жүкті болу мен босануға байланысты табысынан айырылу жағдайы бойынша әлеуметтік төлем тағайындау; 
•    Оралман мәртебесін беру немесе ұзарту; 
•    Мүгедектерге кресло-арбалар беру; 
•    Мүгедектерді санаторий-курорттық емдеумен қамтамасыз ету; 
•    Үйде күтім көрсету жағдайында арнаулы әлеуметтік қызмет көрсетуге құжаттар рәсімдеу. 

Қажетті құжаттар тізімімен және өтініш үлгісімен қызметті таңдаған кезде көрсетілетін сілтеме бойынша өтіп, порталда танысуға болады.
 

«Курсивті» кез келген жерде оқыңыз. Бизнес әлеміндегі ең өзекті жаңалықтар Facebook, Telegram және Яндекс.Дзен-де.

banner_wsj.gif

 

#Қазақстандағы коронавирус

Читайте нас в TELEGRAM | https://t.me/kursivkz

Читайте свежий номер

kursiv_uz_banner_240x400.jpg