Карантин кезінде жұмысшыны ақысыз еңбек демалысына жіберу заңды ма? Министр көптің көңіліндегі сұрақтарға жауап берді

Жеке үй ауласында іс-шара өткізу де қылмыс болып саналмақ

Фото:kursiv.kz

Карантин кезінде елімізде біраз азаматтар тұрақты жұмысы мен табысынан айырылды. Түбегейлі жұмыстан кетпегендер ақысыз еңбек демалысына жіберілді. Әділет министрі Марат Бекатаев еңбек саласындағы осы үрдістің қаншалықты заңды екеніне тоқталды. 

Бекетаев ТЖ кезінде несие төлемін кейінге шегерген азаматтардың министрлікке жиі хабарласып, шағым білдіріп жатқанын айтты. Оның сөзінше, азаматтар банк белгілеген артық төлемдер үшін шағым айтқан. 

    «Алайда бұл мәселе бойынша біздің ведомство шешім қабылдай алмайды. Ал карантин басталған кезде жеке сот орындаушыларына онлайн-сатып алу, транзакция жасау, шоттарға тыйым салу және бұғаттау бойынша қатаң шаралар қолданбау туралы нұсқау берілгені рас. Тыйым салынған мүлікті сату бойынша аукциондар да тоқтап тұр» деді ол. 

Министр қазақстандықтардың медициналық деректері ұрланды деген мәлімдемеге де жауап берді. Ондай мәлімдемені кибер шабуылдарды зерттеу және талдау орталығы (ЦАРКА) жариялаған болатын. 

    «Біз барлық деректер базасын тексеріп шықтық. Мемлекеттік базада ондай ештеңе болмаған. 1340.kz деп аталатын жүйеде жеке тұлғалардың деректері мемлекеттік базамен біріктірілмеген. Деректер базасы кесірінен мәліметтер ұрланды деген ешқандай қисынға келмейді. Егер олардың арасында интеграция болмаса, онда деректердің ұрлануы тіпті мүмкін емес. Ал деректер базасын қорғау бойынша министрлік жүргізетін шараларға келсек, мемлекеттік органдардың серверлік орталығында орналасқан бұл жүйе жедел ақпараттық қауіпсіздік орталығына қосылған. Жедел орталық ақпараттық жүйеде тәулік бойы мониторинг жасап, ұлттық ақпараттық қауіпсіздік үйлестіру орталығымен бірігіп жұмыс істейді» дейді министр. 

Еске салсақ, осыған дейін кибер шабуылдарды зерттеу және талдау орталығы 2020 жылдың өзінде жеке тұлғалардың интеграцияланған мемлекеттік деректер базасында 24,5 мың телефон қоңырауларының аудиожазбасы мен ондаған гигабайт болатын жеке мәліметтер жиналып қалғанын жария еткен болатын.

«Бұл ақпараттар жарты жылдан бері авторизациясы да жоқ кез-келген қолданушы үшін қолжетімді болып келе жатыр. Осылайша денсаулық сақтау министрлігі жинаған орасан мол ақпаратты оңай алуға жол ашады» деп жазған болатын аталған ұйым Телеграм каналында. 

Министрлік басшысы алимент мәселесін де айналып өткен жоқ. Оның айтуынша, алиментті дер уақытында төлемеу бойынша 908 іс ішкі істер органдарына жіберіліп қойған. 2020 жылдың 6 айында алимент өндіру туралы 210 мың іс өндірісте болған. Сондай-ақ алимент төлемі бойынша қор құрылып жатқанын, бірақ оның әлі жинақтау кезеңінде екенін де жария етті. 

    «Бұл әлеуметтік қор республикалық жеке сот орындаушылар палатасының базасында құрылды. Оның тұрақты жұмысын жүргізу үшін қаржы жинау кезеңі іске асырылуда. Ақшаны бөлістірмес бұрын алдымен жинап алу керек. Ақша бәрібір жеткіліксіз болғандықтан оны барлық мұқтаж адамға тарату мүмкін де емес. Ол үшін арнайы комиссия құрылған. Комиссияны бұрынғы сенатор Серік Ақылбай басқарады. Комиссия құрамында өзге де ықпалды адамдар бар. Комиссия көмек үлестіру бойынша нақты шешім қабылдап отырады. Қаржы ең мұқтаж жандарға ғана жіберілмек. Біржолғы төлем бойынша шектеулер болады. Ондай төлем көлемі 1 млн теңге шамасында болуы мүмкін. Нақты есебін жинақтау кезеңі біткен соң жариялаймыз» деді Бекетаев. 

Сондай-ақ министрдің айтуынша, қызметкерді мәжбүрлеп ақысы төленбейтін демалысқа жіберу заңды болып саналмайды. Тек жұмыс беруші мен жұмысшы өзара келіскен жағдайға ғана бұл шаруа заң аясында реттелген болып есептелмек. Сондай-ақ ведомство басшысы бекітілген санитарлық талаптарды аяқ асты етудің соңы әкімшілік жауапкершілікке әкеліп соқтыратынын да айтты. 

    «Маска тақпай дүкен, дәріхана, нысандарға кірер болсаңыз сізге айыппұл салынады. Нысан иесі сізді маскасыз ішке жібермеуі мүмкін. Жіберген жағдайда олардың өзі жазаланады. Сондай-ақ жеке үй ауласында да іс-шаралар өткізу қылмыс ретінде қарастырылады. Алғаш рет солай істесе 83 мың теңге айыппұл салынады. Екінші рет қайталанып, оның соңы адамдарға жаппай жұқтыруға ұласса онда 2000 АЕК айыппұл салынады немесе айыпталушы 10 жылға бас бостандығынан айырылады. ТЖ кезінде белгіленген талаптар мен шектеулерді бұзғаны үшін әкімшілік құқық бұзушылық кодексінің 476-бабы негізінде жауапкершілік туындайды. Ал гигиеналық нормативтер талабын бұзған азаматтар 425-бап негізінде жауапкершілікке тартылады. Аталған санитарлық ережелерді денсаулық сақтау министрі 5 шілдеде бекітті» деді» деді министр. 

P.S. Еліміздің кез-келген азаматы туындаған барлық құқықтық сауалдар бойынша мына телефонға хабарласып, мән-жайды біле алады: 119, +7 (7172) 58-00-58. WhatsApp: +7 708 693 56 31. 


 

«Курсивті» кез келген жерде оқыңыз. Бизнес әлеміндегі ең өзекті жаңалықтар Facebook, Telegram және Яндекс.Дзен-де.

banner_wsj.gif

 

Шетелде оқу үшін үйден шықпай-ақ құжат тапсыра аласыз. Ол қалай?

Конкурсқа қатысу онлайн жүзеге асады

Фото: Shutterstock

Жаз – талапкерлердің жаппай оқуға құжат тапсыратын, ғылым-білімге қатысты болашағына жоспар құратын белсенді мезгіл. Елімізде шет мемлекетке барып білім алғысы келетін жастар да көп. Олар үшін «электронды үкімет» порталында жақсы мүмкіндік қарастырылған. 

Бұдан былай шетелдегі оқу конкурстарына қатысу үшін білім беру саласындағы халықаралық шарттар аясында үйде отырып-ақ құжат тапсыруға болады. Пайдаланушы білім алғысы келетін ел мен мамандықты порталда көрсете отырып, «бакалавриат», «магистратура», резидентура» және «докторантура» дәрежелеріне құжат тапсыра алады.


Қызметті тұтыну үшін алдымен порталда авторизация жасайсыз. Содан кейін «Білім» қосымша бетіне кіріп, «Білім беру саласындағы халықаралық шарттар шеңберінде шетелде оқу конкурсына қатысу үшін құжаттарды қабылдау» дегенді таңдап, қызметке тапсырыс бересіз. 

Әрі қарай білімі, отбасылық жағдайы, еңбек қызметі туралы мәліметтерді енгізіп, барлық қажетті бағандарды толық толтырып, ЭЦҚ немесе смс-пароль арқылы қол қоясыз. Бұл қызмет жеке тұлғаларға бір жұмыс күні ішінде көрсетіледі. 

 Еске салайық, жақында білім және ғылым министрлігі «Болашақ» халықаралық бағдарламасына құжаттар қабылдау басталғанын жария етті. Бағдарлама арқылы азаматтар магистратура, докторантура, резидентура және тағылымдама бағдарламалары бойынша білім алады. Бұл конкурсқа қатысу үшін де құжаттарды eGov порталы арқылы онлайн жолдауға мүмкіндік бар. Құжат қабылдау 2020 жылдың 27 шілдесі мен 31 қазаны аралығында жүргізіледі. 

Министрлік дерегіне сүйенсек, биыл «Болашақ» бағдарламасы бойынша академиялық оқуға 85 және тағлымдамадан өтуге 95 басымдыққа ие мамандықтар ұсынылып отыр. Сондай-ақ бағдарлама аясында оқуға QS, ARWU, Times Higher Education, The U.S. News Best Global University халықаралық рейтінгтерінің кемінде екеуінің TOP-100 құрамына кіретін және Экономикалық ынтымақтастық және даму ұйымына мүше елдердегі университеттердің US News Global рейтингісінде кемінде 65 жаһандық балға ие 138 жоғары оқу орны бекітілген. 

«Курсивті» кез келген жерде оқыңыз. Бизнес әлеміндегі ең өзекті жаңалықтар Facebook, Telegram және Яндекс.Дзен-де.

banner_wsj.gif

 

#Қазақстандағы коронавирус

Читайте нас в TELEGRAM | https://t.me/kursivkz

Читайте свежий номер

qazexpocongresskz.jpg