Жыл соңына дейін Үкімет кәсіпкерлерге қандай жеңілдіктер жасайды?

Орта және шағын бизнесті қолдау жалғаса бермек

Фото: pixabay.com

Үкімет кәсіпкерлерді қолдауын тоқтатпайды. Бизнес өкілдеріне салықтық жеңілдіктер жасау көмегі жыл соңына дейін жалғаспақ. Яғни, 2020 жыл тәмам болғанда бизнестің барлық категориясындағы субъектілер үшін жаңа жоспарлы салықтық тексерулер жүргізілмейді. 


Еске салсақ, президент жарлығымен жыл басынан бері шағын және микрокәсіпкерлікті тексеру және профилактикалық бақылау жүргізуге мораторий жарияланған болатын. Сонымен қатар тікелей президенттің бекітуімен 2020 жылдың 1 қаңтарынан үш жылға дейін кіші және шағын бизнес субъектілері салықтан босатылған. Экономиканың әр саласында салық, еңбекақы қорынан төленетін әлеуметтік төлем және мүлік салығы бойынша мөлшерлемелер 2020 жылдың 1 қазанына дейін күшін жойды. Ауыл шаруашылығы мақсатындағы жерлер үшін салынатын салық та тоқтатылды. Әлеуметтік маңызы бар азық-түлік тауарлары үшін салынатын қосымша құн салығы да 1 қазанға дейін 12 пайыздан 8 пайызға дейін төмендетілді.

 
    «Бизнес-қауымдастықтар және кәсіпкерлердің шағымы бойынша орталық және жергілікті атқарушы органдардың актілерін тоқтату немесе жою бойынша механизм енгізу ұсынылды. Яғни, бизнеске кедергісін келтіретін шешім жылдам жойылады немесе түзетіледі. Бұл бақылау мен қадағалаудан түсетін салмақты азайту үшін. Бұл жоспарлы тексеруден «кәсіпорын диагностикасына» көшу әдісі. Мұндай диагностика жауапкершілікке тартусыз жүргізіледі және жоспарлы тексерістер санын азайтады» деген еді ұлттық экономика министрі Руслан Дәленов үкімет отырысында. 


Министрлік ұсынған мәліметке сүйенсек, 2019 жылы шағын және орта бизнестің экономикадағы үлесі 30,8 пайызды құраған. Ал өндіріс көлемі 31,2 трлн теңгеге жеткен. Қазір біз үшін маңыздысы бизнес-климатты жақсарту. Сол мақсатта салықтық ынталандыру, тексеруді азайту және несиелеуді кеңейту бойынша бастамалар қолға алынды деді Дәленов. Егер бәрі ойдағыдай жүзеге асса 2025 жылы шағын және орта бизнестің экономикадағы үлесі 35 пайызға жетуі тиіс. 


Қаржы нарығын бақылау және дамыту агенттігінің басшысы Мәдина Әбілқасымованың айтуынша, 16 наурыз бен 15 маусым аралығында несиені кейінге шегеру мүмкіндігін 1,8 млн қарыз алушы пайдаланған. Төлеу мерзімі кейінге шегерілген қаржы көлемі – 268 млрд теңге. Ал несиені қайта құрылымдау үшін 12,4 мың шағын және орта бизнес өкілі банктерге өтініш білдірген. Қайта құрылымдалған қаржы көлемі – 165 млрд теңге. 


    «ТЖ режимінің аяқталғанына қарамастан шағын және орта бизнес кәсіпорындары толық көлемде жұмысқа кірісе алмай жатыр. Тауар мен қызметке деген сұраныс біршама азайған, айналым көлемі құлдыраған», - деді Әбілқасымова. 


Бұл ретте шағын және орта бизнес үшін несие бойынша төлемді кейінге шегеру мүмкіндігінің тағы да созылғанын айта кету керек. Яғни, 16 маусымнан бастап 15 қыркүйекке дейін аталған бизнес категория өкілдері банк немесе микро қаржылық ұйымға хабарласып, қолдаудың осы түрін пайдалана алады. Несие ұйымы әр жағдайды жеке қарастырып, анық қаржылық қиындықты байқаған жағдайда екі түрлі қолдау түрін ұсынады.

Алғашқысы – қарыз алушының қаржылық жағдайы қалпына келгенге дейінгі уақытқа төлемді шегеру мүмкіндігін ұсыну.

Екіншісі – мемлекеттік бағдарлама аясында жеңілдетілген шартпен несиені қайта қаржыландыру. Мұндай мүмкіндікті бұрын да несие төлемін кейінге шегерген (және шегермеген) барлық шағын және орта бизнес ала алады. 
 

banner_wsj.gif

Сотталғандар жазасын провизорлық стационарда өтеп жүр

Павлодар облысында шартты түрде сотталғандар дәрігерлерге көмекке келді

Фото: Қылмыстық атқару жүйесі департаментінің баспасөз орталығы

31 жастағы павлодарлық Светлана біраз уақыт бұрын шартты түрде сотталып, пробация қызметіне тіркеуге тұрған еді. Кейін оған Павлодар ауданының жұмыспен қамту орталығына жолдама берілген. Соған сәйкес, медициналық білімі әрі осы салада тәжірибесі бар Светлана провизорлық стационарлардың біріне жұмыс істеуге жіберілді. 

«Сотталғанға дейін облыстық ауруханада жұмыс істеп, тәжірибе жинадым. Стационарда қызмет етіп жүргеніме бір аптадан астам уақыт өтті. Негізгі міндетім – пациенттерге күтім жасау», - дейді Светлана. 

Одан бөлек, ол медициналық колледжге құжаттарын тапсырып, білімін одан әрі жетілдірмек ниетте. 

Светлана сияқты Қайрат есімді сотталған азамат та жазасын провизорлық стационарларға көмек көрсету арқылы өтеуде.   

«Облыс орталығындағы ауруханаларға төсект, жиһаз тасып жүрмін. Осы сияқты басқа да жұмыстар жүктеледі. Жаза ретінде белгіленген сағаттарды өтеп қана қоймай, қоғамға пайдамның тиіп жатқанына қуаныштымын. Жазаның осындай түрінің белгіленуі әділ деп есептеймін», – дейді ол. 

Пробация қызметінің бастығы Әсет Мыңжасаровтың айтуынша, еңбектің мұндай түріне тұрақты жұмыс орны жоқ әрі бас бостандығын шектеу жазасы белгіленген сотталғандар тартылады. 

«Пандемияға және пневмонияға шалдыққандар саны күрт артқандықтан, Павлодар облысында қосымша провизорлық стационарлар ашылды. Бұл өз кезегінде қосымша жұмыс күшін қажет етеді. Сондықтан жазасын өтеу жөнінде жолдама алғандар қаладағы ауруханаларға жіберіліп, көмек көрсетуде. Бүгінде сотталған бес азамат осы іске жұмылдырылды. Бұл бағыттағы жұмыстар алдағы уақытта да жалғасып, жазасын өтеушілер медицина қызметкерлеріне қол ұшын созатын болады»,  – дейді Әсет Мыңжасаров. 

Айта кетелік, Павлодар облысының аумағында қосымша провизорлық стационарлар мен триаж-орталықтар ашылғалы бері дәрігерлердің, медициналық қызметкерлердің аздығы қатты сезіле бастады. Осы уақытқа дейін денсаулық сақтау саласының ардагерлері, жеке емханалардың қызметкерлері, медициналық жоғары оқу орнын тәмамдаған түлектер, барлығы 200-ден астам адам дәрігерлерге көмекке келді. Жүктемені азайтып, пациенттерді сапалы ем-дом көрсету үшін тағы 400-ге жуық адам керек. Олардың барлығына белгіленген тарифтік көрсеткіштер бойынша қаражат төленетін болады. 

 

 

banner_wsj.gif

#Коронавирус в Казахстане

Читайте нас в TELEGRAM | https://t.me/kursivkz

Читайте свежий номер

kursiv_uz_banner_240x400.jpg