Үйде отырып-ақ алуға болатын құжаттар тізімі белгілі болды

Сондай-ақ министр азаматтарға қандай жағдайда өтемақы берілетінін де айтты

Фото: Shutterstock

Орталық коммуникациялар қызметінде брифинг өткізген әділет министрі Марат Бекетаев ведомство қолға алған жаңалықтармен бөлісті. Министрдің айтуынша, мемлекеттік қызмет көрсету саласында тіркеуді жеңілдету, құжаттар мерзімі мен тізімін қысқарту, бірқатар мемлекеттік қызметтерді электронды форматқа көшіру бойынша бастамалар бар.


 
Бұдан былай азаматтарға мейлінше ыңғайлы болу үшін азаматтық хал актілерін тіркеудің экстерриториалды қағидасы енгізілмек. Яғни, азамат қандай да бір куәлікті алуы қажет болған жағдайда қай өңірде өмірге келгені, қай аймақта тіркеуде тұрғанына қарамастан кез-келген тіркеуші органнан керек құжатын ала алады. 

Сонымен қатар тіркеуші орган мемлекеттік органдардың ақпараттық жүйесінен ала алатын – сот шешімі, медициналық куәлік, ҚР-дағы акт жазбалары туралы мәлімет секілді құжаттарды азаматтардың ұсынуы да алынып тасталды.

Сондай-ақ мемлекеттік қызметтерді автоматтандыруға орай азаматтық хал актілерін тіркеуге алудың кейбір түрлері де жойылды. Бұдан былай екі куәліктің орнына (бала асырап алу немесе әке болуды анықтау және туу туралы куәлік) тіркеуші орган баланың дербес деректері және ата-анасы туралы деректері қамтылған бір ғана куәлік береді.

Министр айтқан тағы бір жаңалық – ендігі ретте сапасыз заңдық көмек алу кесірінен зардап шеккен азаматтар сақтандыру өтемақысынан үміттене алады. Атқарушылық іс жүргізуге қатысқан және әлеуметтік, қаржылық тұрғыда қиын жағдайға қалған азаматтарға көмек көрсету үшін жеке сот орындаушылардың республикалық палатасында «Әлеуметтік қор» құрылған. Қор өз еркімен қаржылай қолдау білдіретін және жеке сот орындаушыларының жарнасы есебінен жұмыс істейді. Ал қор жұмысын бақылау аталған палатаның қамқорлық кеңесіне жүктелген.

Министр 2019 жылдың 1 қаңтарынан бері әлеуметтік, қаржылық қиындықта қалған азаматтар үшін тегін кешенді әлеуметтік заңдық көмек қарастырылғанын да мәлімдеді. Ондай көмекті адвокаттар мен заң кеңесшілері клиент хабарласқан сәттен бастап оның мәселесі толық шешімін тапқанға дейін көрсететін болады.
 
Дұрыс емес заңдық көмек алған азаматтар (адвокат пен заң кеңесшісінің әрекетсіздігі немесе құжаттарды дұрыс рәсімдемеуі) сақтандыру өтемақысынан үміттене алады. Ендігі ретте азамат заңдық көмек алу туралы келісім жасасқан кезде адвокаттан (немесе заң кеңесшісінен) кәсіби жауапкершілікті сақтандыру туралы келісімшарттың көшірмесін талап етуі тиіс. 

Ал 2020 жылдың шілде айынан бастап бүкіл республика аумағында кепілді электронды тіркеу шарасы басталмақ. Министрдің сөзінше, жылжымайтын мүлік иелерінің уақыты мен қаржысын үнемдеу мақсатында екінші деңгейлі банктермен келісе отырып кепіл мүлігін тіркеу электронды форматқа көшірілмек. Яғни, осы келісім нәтижесінде жылжымайтын мүлік иесі құжат тапсыру үшін халыққа қызмет көрсету орталығына барып әуре болмайды. Кепіл туралы мәліметті банктер тіркеуші органға электронды форматта жіберіп отырады. Тіркеу бір жұмыс күні ішінде реттеледі. 
 

banner_wsj.gif

Сотталғандар жазасын провизорлық стационарда өтеп жүр

Павлодар облысында шартты түрде сотталғандар дәрігерлерге көмекке келді

Фото: Қылмыстық атқару жүйесі департаментінің баспасөз орталығы

31 жастағы павлодарлық Светлана біраз уақыт бұрын шартты түрде сотталып, пробация қызметіне тіркеуге тұрған еді. Кейін оған Павлодар ауданының жұмыспен қамту орталығына жолдама берілген. Соған сәйкес, медициналық білімі әрі осы салада тәжірибесі бар Светлана провизорлық стационарлардың біріне жұмыс істеуге жіберілді. 

«Сотталғанға дейін облыстық ауруханада жұмыс істеп, тәжірибе жинадым. Стационарда қызмет етіп жүргеніме бір аптадан астам уақыт өтті. Негізгі міндетім – пациенттерге күтім жасау», - дейді Светлана. 

Одан бөлек, ол медициналық колледжге құжаттарын тапсырып, білімін одан әрі жетілдірмек ниетте. 

Светлана сияқты Қайрат есімді сотталған азамат та жазасын провизорлық стационарларға көмек көрсету арқылы өтеуде.   

«Облыс орталығындағы ауруханаларға төсект, жиһаз тасып жүрмін. Осы сияқты басқа да жұмыстар жүктеледі. Жаза ретінде белгіленген сағаттарды өтеп қана қоймай, қоғамға пайдамның тиіп жатқанына қуаныштымын. Жазаның осындай түрінің белгіленуі әділ деп есептеймін», – дейді ол. 

Пробация қызметінің бастығы Әсет Мыңжасаровтың айтуынша, еңбектің мұндай түріне тұрақты жұмыс орны жоқ әрі бас бостандығын шектеу жазасы белгіленген сотталғандар тартылады. 

«Пандемияға және пневмонияға шалдыққандар саны күрт артқандықтан, Павлодар облысында қосымша провизорлық стационарлар ашылды. Бұл өз кезегінде қосымша жұмыс күшін қажет етеді. Сондықтан жазасын өтеу жөнінде жолдама алғандар қаладағы ауруханаларға жіберіліп, көмек көрсетуде. Бүгінде сотталған бес азамат осы іске жұмылдырылды. Бұл бағыттағы жұмыстар алдағы уақытта да жалғасып, жазасын өтеушілер медицина қызметкерлеріне қол ұшын созатын болады»,  – дейді Әсет Мыңжасаров. 

Айта кетелік, Павлодар облысының аумағында қосымша провизорлық стационарлар мен триаж-орталықтар ашылғалы бері дәрігерлердің, медициналық қызметкерлердің аздығы қатты сезіле бастады. Осы уақытқа дейін денсаулық сақтау саласының ардагерлері, жеке емханалардың қызметкерлері, медициналық жоғары оқу орнын тәмамдаған түлектер, барлығы 200-ден астам адам дәрігерлерге көмекке келді. Жүктемені азайтып, пациенттерді сапалы ем-дом көрсету үшін тағы 400-ге жуық адам керек. Олардың барлығына белгіленген тарифтік көрсеткіштер бойынша қаражат төленетін болады. 

 

 

banner_wsj.gif

#Коронавирус в Казахстане

Читайте нас в TELEGRAM | https://t.me/kursivkz

Читайте свежий номер