Алматыда карантин шаралары күшейтілді

Шаһарда қандай мекемелер жұмысын тоқтатпайды?

Фото: Shutterstock

Сағынтаев тұрғындардың түсіністік танытуын сұрады

Алматы қаласының әкімі Бақытжан Сағынтаев әлеуметтік желідегі парақшасында 20-21 маусымда мегаполисте карантин шараларының күшейтілетінін, соған орай тұрғындардың түсіністік танытуын сұрап жазба жариялады. 


    «Қауіпті індеттің ушыға түсуіне байланысты Үкімет эпиджағдайды тұрақтандыру бойынша жаңа шараларды қолға алды. Осы орайда Алматыда да карантин режимін күшейту бойынша шаралар қабылданды. Сенбі-жексенбі, яғни 20-21 маусым күндері ірі сауда және қызмет көрсету нысандарының, қоғамдық көліктің қызметі тоқтатылады.Бұған қоса саябақтар, скверлер мен жаяу жүргіншілер аймағы, өзендер мен су қоймаларының жағалаулары, тау шаңғысы курорттары және басқа да қоғамдық орындар жабылады. Осыған байланысты қала тұрғындарын бұл жұмыстарға түсіністікпен қарауға шақырамын. Карантин шараларын босаңсыту – COVID-19-дың өршуіне әкеп соқты. Қала тұрғындарынан көшеде жүруін шектетуін сұраймыз. Әсіресе қарт адамдардың үйде отырғаны абзал. Қауіпі дендеп бара жатқан мына ауруды тұншықтыру өзімізге байланысты екенін естен шығармайық. Барлық туындаған сұрақтар бойынша 1308 нөміріндегі call-орталыққа хабарласуға болады», - деп жазған қала әкімі.


Қалалық әкімдік баспасөз қызметінің мәліметінше, демалыс күндері үй жанындағы дүкендер мен аптекалар, сұлулық салоны, ТЖО, көлік жуу және спа салондары жұмысын жалғастыра береді. Яғни, адамдар мейлінше аз жиналатын және вирус жұқтыру қаупін туындатпайтын қызмет көрсету орындарына шектеу жасалмайды. Сонымен қатар тауар және тамақ жеткізу қызметі де жұмысын жалғастырады. Ал қоғамдық транспорт дүйсенбі күні таңғы 6-дан қайтадан жұмысқа кіріседі. 


Алматы қаласының бас мемлекеттік санитарлық дәрігері Жандарбек Бекшин онлайн брифингте карантин режимінің қай деңгейде күшейетінін айтты. 


  «Қазір біз жағдайды бақылап отырмыз. Егер ауру деңгейі күн сайынғы 7 пайыздық өсіммен жалғаса беретін болса онда қосымша карантиндік шаралар қолға алынады және қазіргі шектеу шаралары созылады. Дәл қазір қаладағы ауру деңгейі 5 пайыздан төмен.  Біздің мақсатымыз – осы позицияны ұстап қалу ғана емес, күн сайынғы ауру жұқтыру көрсеткішін 1 пайыздан төменгі шекке дейін төмендету», - дейді Бекшин. 


Оның айтуынша, 20-21 маусым күнгі қатаң карантин шектеулерін бақылау полиция департаментіне жүктелген. Патрулдік-бекет қызметі патруль жасап, бақылайды. Ереже бұзушыларға бастапқыда ескерту жасалады, егер азаматтар оған құлақ аспаса онда қоғамдық тәртіпті бұзғаны үшін тиісті шаралар қолданылмақ. Бекшин сондай-ақ қала шекараларына блок-бекеттер қойылмайтынын, азаматтар қала мен облыс арасында емін-еркін қозғала алатынын да мәлімдеді. 


Бас санитар дәрігердің сөзінше, қазір қаладағы ахуал қиындап бара жатыр. Шаһарда симптомсыз науқастар саны артқан. 

    «Соңғы екі аптадағы жағдайды айтар болсақ, 3 маусымнан бері коронавирус инфекциясын жұқтыру мөлшері екі есеге өскен. Инфекциялық стационарлардағы науқастар саны 95 пайызға дейін көбейді. Егер наурыз айында ауру деңгейі сырттан келушілер есебінен көбейсе, сәуір айында біз халыққа диагностика жасауды және осал топтармен жұмыс істеуді арттырдық. Ал маусым айында ауру деңгейі азаматтардың өздерінің хабарласып, қаралуы арқылы анықталуда», - деді Жандарбек Бекшин. 


Бас санитар бұл ретте «Рахат» фабрикасының өз еркімен екі аптаға жабылғанын, ал «Көк базар» сот шешімімен бір айға жабылғанын және аталған сауда орнына санитарлық талаптарды сақтамағаны үшін 1 млн 722 мың теңге көлемінде айыппұл салынғанын да айтты. 


Қазіргі таңда қалада коронавирус инфекциясын жұқтырудың 3 217 жағдайы тіркеліп отыр. 
 

banner_wsj.gif

Әлем елдерінің парламентінде гендерлік теңдік сақтала ма?

Соңғы 25 жылда әйелдердің үлесі 2 есе өскен

Фото: Асқар Ахметуллин

Соңғы 25 жылда парламенттегі әйелдердің үлесі екі есе өскен. Халықаралық парламент одағының (Inter-Parliamentary Union) мәліметі бойынша, бүкіл әлемдегі сайланбалы заң шығарушы органдардағы орынның 25 пайызы әйелдерге тиесілі. 

1995 жылдары парламенттегі әйелдердің үлесі бойынша Скандинавия және басқа да дамыған мемлекеттер көшбасшы болып, бірінші орында Швеция тұрған. Қазіргі кезде парламенттегі әйелдер саны бойынша Шығыс Африкада орналасқан Руанда көш бастап тұр. 

Төменгі палатадағы депутаттық 80 орынның 49-ын әйелдер иеленген, соның ішінде 24 орын әу баста-ақ әйел адамдар үшін арнайы квота ретінде бөлінеді. Дүниежүзілік экономикалық форумның байламы бойынша, 2015 жылы Руанда Үкіметі әлемдегі ең нәтижелі биліктің ондығына енген.

Куба Республикасының бір палаталы парламентіндегі 605 депутаттың 322-і – әйелдер, бұл мемлекетте биліктегі әйелдердің үлесі өте жоғары. Одан кейінгі орында Боливия тұр, онда парламен төменгі палатасының 53,3 пайызын әйелдер құрайды. 2019 жылдан республиканы ел тарихындағы алғашқы әйел-президент Жанин Аньес басқарып келеді. 

Ал төртінші орында – Біріккен Араб әмірліктері. Бұл елде парламеттің қызметін ұлттық аймақтық кеңес атқарады, онда президент резолюциясы бойынша әйел адамдарға 50 пайыз квота бөлінген. БАӘ ұлттық кеңесі – заң шығарушы орган емес. Тек заңды талқылау мен оған өзгертулер мен толықтыру енгізуге құқылы. 

Ал Швеция қазір жетінші орынға түсіп кеткен. Ел парламентіндегі әйелдердің үлесін арттыру бағытында соңғы ширек ғасырда Оңтүстік және Солтүстік Америка елдері қарқынды дамыды. Бұл ретте Тынық мұхиты аймағындағы мемлекеттерде алға жылжу аз. Мәселен, Папуа-Жаңа Гвинея және Вануату сынды мемлекеттердің парламентінде әйел адамдар мүлдем жоқ. 

Ал ТМД елдері арасында парламенттегі әйелдер саны бойынша бірінші орында Беларусь келеді, ал әлем елдері арасында –22 орында. Бұл елде парламент төменгі палатасындағы әйел депутаттардың саны 40 пайызды құрайды.

aiel.png

Осы ретте әйелдердің сайлау процесіне қатысуы елдегі саяси еркіндіктің кепілі бола алмайтынын айта кеткен жөн. Айталық, Руанданың өзі Freedom House тұжырымы бойынша, еркіндік рейтингіндегі 100 балдың тек 22-сін жанап, еркіндік жоқ елдердің қатарына кірген. Ал Араб әмірліктеріндегі еркіндік деңгейі 17 баллға бағаланса, Куба Республикасында тіптен төмен – бар-жоғы 14 балл. 

Кейбіл елдерде парламенттегі әйелдер санының артуын арнайы квота енгізілуімен түсіндіруге болады. Парламентаралық кеңестің бас хатшысы Мартин Чунгонг  квота енгізілген елдерде әйелдер өз қабілеттерін барынша көрсете алатынын атап өткен.

Әйелдердің сайлау процесіне қатысуына кепіл берілуі көптеген елдерде өз нәтижесін беріп келеді. Биліктің сайланбалы органдарында әйелдер үшін арнайы квота бөлу тәжірибесі әлемнің 104 елінде қолданылады. 
 

banner_wsj.gif

#Коронавирус в Казахстане

Читайте нас в TELEGRAM | https://t.me/kursivkz

Читайте свежий номер

kursiv_uz_banner_240x400.jpg