20 маусымнан бастап Қазақстан азаматтары қай елдерге ұша алады?

Министрлік тізімді жария етті

Фото:Shutterstock

Индустрия және инфрақұрылымдық даму министрлігі халықаралық әуе рейстерінің қалыпқа келтірілгені жайлы дерек таратты. 


    «Коронавирус инфекциясының пайда болуы мен таралуын болдырмау жөніндегі ведомство аралық комиссияның 2020 жылғы 11 маусымдағы шешіміне сәйкес денсаулық сақтау министрлігінің ұсынысын ескере отырып дүниежүзілік денсаулық сақтау ұйымы жария еткен картадағы эпидемиологиялық деңгейге байланысты 2020 жылдың 20 маусымынан бастап Түркия, Қытай, Оңтүстік Корея, Таиланд, Грузия және Жапония елдеріне халықаралық әуе рейстері ұша бастайды» делінген министрлік хабарламасында. 


    Қазақстан тарапының дәл осы мемлекеттермен халықаралық әуе байланысын қалпына келтіруі бекер емес. Аталған мемлекеттерде коронавирус пандемиясының қарқыны аз да болса бәсеңдеген. Түркияда вирус жұқтырғандардың жалпы саны 175 мыңға таяған. Оның 147 мыңы сауығып шықса, 5000-ға жуығы көз жұмған. Қытайда статистика бұдан біршама төмен. 83 мың адам ауырып, 5000-ға жуығы қайтыс болған. 78 мыңы жазылып шыққан. Жапонияда 17 мың адам Covid-19 жұқтырып, 922 адам айыға алмай бақиға аттанды. 15 мыңы тәуір болды. Оңтүстік Кореяда 12 мыңнан астам адам вирус тырнағына ілініп, 300-ге жуық азамат көз жұмды. Таиландта 3000-нан астам адамнан қауіпті вирус анықталып, 58 адам қайтыс болса, 3000-ға жуығы емделіп шыққан. Ал Грузияда осы вирус жұқтырғандар саны – 831. Оның 13-і қайтыс болып, 700-ге жуығы сауыққан.

 
Халықаралық маршруттар бойынша рейстер саны әуе байланыстары туралы үкімет аралық келісім және әр бағыттағы әуе кемелерінің коммерциялық жүктемесі негізінде реттелмек. Ал рейс пен билет сатылымы әуе компаниялары сайтында жарияланған кесте бойынша жүзеге асырылмақ. 


    Алдағы уақытта Қазақстанмен әуе рейсін қайта жандандыратын елдер қатарына Ресей де қосылуы мүмкін. Росавиация 15 шілдеден бастап халықаралық әуе рейсерін ішінара жандандыру бойынша ұсыныс білдірген. Бірінші кезекте 15 елмен қатынас қалпына келтірілмек. Олардың арасында Қазақстан да бар. 
Бұған дейін министрлік Әзербайжандағы эпидемиологиялық жағдайға байланысты аталған елмен халықаралық рейсті әзірге іске қоспайтынын мәлімдеген болатын. Себебі, Әзербайжан тарапы халықаралық рейстерге салынған тыйымды 1 шілдеге дейін ұзартып тастаған. 


    Дәл қазіргі мезетте елімізде 14 мың азамат аса қауіпті вирусты жұқтырып, олардың 9000-ы жазылып шыққан. Өкінішке қарай 67 адам қатерлі дерттен көз жұмды. 
 

banner_wsj.gif

Сотталғандар жазасын провизорлық стационарда өтеп жүр

Павлодар облысында шартты түрде сотталғандар дәрігерлерге көмекке келді

Фото: Қылмыстық атқару жүйесі департаментінің баспасөз орталығы

31 жастағы павлодарлық Светлана біраз уақыт бұрын шартты түрде сотталып, пробация қызметіне тіркеуге тұрған еді. Кейін оған Павлодар ауданының жұмыспен қамту орталығына жолдама берілген. Соған сәйкес, медициналық білімі әрі осы салада тәжірибесі бар Светлана провизорлық стационарлардың біріне жұмыс істеуге жіберілді. 

«Сотталғанға дейін облыстық ауруханада жұмыс істеп, тәжірибе жинадым. Стационарда қызмет етіп жүргеніме бір аптадан астам уақыт өтті. Негізгі міндетім – пациенттерге күтім жасау», - дейді Светлана. 

Одан бөлек, ол медициналық колледжге құжаттарын тапсырып, білімін одан әрі жетілдірмек ниетте. 

Светлана сияқты Қайрат есімді сотталған азамат та жазасын провизорлық стационарларға көмек көрсету арқылы өтеуде.   

«Облыс орталығындағы ауруханаларға төсект, жиһаз тасып жүрмін. Осы сияқты басқа да жұмыстар жүктеледі. Жаза ретінде белгіленген сағаттарды өтеп қана қоймай, қоғамға пайдамның тиіп жатқанына қуаныштымын. Жазаның осындай түрінің белгіленуі әділ деп есептеймін», – дейді ол. 

Пробация қызметінің бастығы Әсет Мыңжасаровтың айтуынша, еңбектің мұндай түріне тұрақты жұмыс орны жоқ әрі бас бостандығын шектеу жазасы белгіленген сотталғандар тартылады. 

«Пандемияға және пневмонияға шалдыққандар саны күрт артқандықтан, Павлодар облысында қосымша провизорлық стационарлар ашылды. Бұл өз кезегінде қосымша жұмыс күшін қажет етеді. Сондықтан жазасын өтеу жөнінде жолдама алғандар қаладағы ауруханаларға жіберіліп, көмек көрсетуде. Бүгінде сотталған бес азамат осы іске жұмылдырылды. Бұл бағыттағы жұмыстар алдағы уақытта да жалғасып, жазасын өтеушілер медицина қызметкерлеріне қол ұшын созатын болады»,  – дейді Әсет Мыңжасаров. 

Айта кетелік, Павлодар облысының аумағында қосымша провизорлық стационарлар мен триаж-орталықтар ашылғалы бері дәрігерлердің, медициналық қызметкерлердің аздығы қатты сезіле бастады. Осы уақытқа дейін денсаулық сақтау саласының ардагерлері, жеке емханалардың қызметкерлері, медициналық жоғары оқу орнын тәмамдаған түлектер, барлығы 200-ден астам адам дәрігерлерге көмекке келді. Жүктемені азайтып, пациенттерді сапалы ем-дом көрсету үшін тағы 400-ге жуық адам керек. Олардың барлығына белгіленген тарифтік көрсеткіштер бойынша қаражат төленетін болады. 

 

 

banner_wsj.gif

#Коронавирус в Казахстане

Читайте нас в TELEGRAM | https://t.me/kursivkz

Читайте свежий номер