Мемлекеттік органдар 130 млрд теңгеге жуық қаржы үнемдейді

Соның ішінде 4,2 млрд теңге түрлі конференциядан бас тартудың есебінен қазынада қалады

Фото: Асқар Ахметуллин

Мемлекеттік органдар, әкімдіктер, квазимемлекеттік компаниялар  биыл 128,6 млрд теңге үнемдейді. Бұл туралы премьер-министрдің бірінші орынбасары-қаржы министрі Ә. Смайылов мәлімдеді. 

«Мемлекеттік органдар, әкімдіктер, ұлттық холдинг мен ұлттық компаниялар жүргізген жұмыстарының нәтижелері бойынша, қысқартуға ұсынылған шығыстардың жалпы сомасы 128,6 млрд теңгені құрайды: оның ішінде орталық мемлекеттік органдар – 23 млрд теңге, өңірлер – 26,6 млрд теңге және квазимемлекеттік сектор субъектілері 79 млрд теңге үнемдейді», – деді қаржы министрі.

Нақтылай кетсек, 4,2 млрд теңге – семинар, конференциялар өткізуден; автокөлік сатып алу, іссапар, өкілдік шығыстар, талдамалық зерттеулерден– 15,7 млрд теңге, басқа да басымдыққа ие емес шығыннан 29,7 млрд теңге қысқартылады. 

Әлихан Смайыловтың айтуынша, бұл жұмыстың бәрі мемлекет басшысы Қасым-Жомарт Тоқаевтың мемлекеттік және квазимемлекеттік секторлардың басым емес шығыстарын қысқарту жөніндегі тапсырмасын орындау барсында атқарылып жатыр. 

banner_wsj.gif

Коронавируспен күреске қанша қаржы бөлінді?

ДСМ мәліметі бойынша, бөлінген қаржының жалпы сомасы 114 млрд теңгені құрайды

Фото: Курсив

ҚР Денсаулық сақтау министрі Алексей Цой елімізде коронавирусқа күреске бөлінген қаражат туралы айтып берді. Ведомство басшысының айтуынша, ауруға қарсы тұруға бөлінген қаржының жалпы сомасы 114 млрд 826 млн теңгені құраған.

«Бұл қаржының 40 млрд 58 миллионы Үкімет қорынан бөлінді. Жеке қорғаныш құралдарын сатып алуға  – 21 млрд 184 млн теңге, дәрі - дәрмек, медициналық бұйымдар сатып алуға – 2 млрд 30 млн теңге, зертханалық жабдықтар мен коронавирусты анықтауға арналған жүйелерді сатып алуға 2,5 млрд теңге қарастырылған», – деді министр  Орталық коммуникациялар қызметінде өткен баспасөз мәслихатында.

Сонымен қатар, коронавирусты анықтауға қажетті реагенттерді әзірлеу және шығару қызметін сатып алуға –  100 млн теңге, ПТР әдісімен зертханалық зерттеулерге –13,7 млрд теңге, жедел медициналық көмек автомобильдерін жабдықтауға қажетті өкпені жасанды желдету аппараттарын сатып алуға 310 млн теңге кеткен.

Бұл ретте Алексей Цой Қазақстан азаматтарын эвакуациялауға 131 млн теңге жұмсалғанын мәлімдеді.

"Республикалық бюджеттен 74 млрд теңге бөлінді. Соның ішінде 19,5 млрд теңге – инфекциялық, карантиндік және провизорлық стационарлардағы медициналық қызметтерге, 40,4 млрд теңге –карантин шараларына тартылған қызметкерлерді ынталандыруға, 14,8 млрд. теңгесі – Нұр-Сұлтан, Шымкент және Алматы қалаларында жедел салынатын үш инфекциялық ауруха салуға жұмсалды",–  деп түйіндеді министр.

Айта кетейік, наурыз айында АҚШ үкіметі коронавирус инфекциясымен күрес әлеуетін күшейту үшін Қазақстанға $ 890 мың бөлуге дайын екендігі хабарланған. Бұл жөнінде олар Қазақстанда алғашқы вирус жұқтырғандар анықталғанға дейін мәлімдеген болатын. Кейінірек CDC агенттігі (АҚШ Ауруларды бақылау және алдын алу орталығы) осы мақсатқа 1,68 млн доллар бөлінгенін хабарлады.

Мамыр айында АҚШ коронавируспен күреске Қазақстанға қосымша 1,5 млн доллар бөлетінің мәлімдеп, нәтижесінде көмектің жалпы сомасы 3,11 млн долларға жетті.
 

banner_wsj.gif

#Коронавирус в Казахстане

Читайте нас в TELEGRAM | https://t.me/kursivkz

Читайте свежий номер

kursiv_uz_banner_240x400.jpg