Шілденің соңында шағын бизнес иелеріне қолдау көрсетіледі. Кәсіпкерлер қандай көмек алмақ?

Қолдау «Бизнестің жол картасы – 2025» аясында жүзеге асады

Фото: Shutterstock

Шағын кәсіппен айналысатын кәсіпкерлерге шілде айында нақты қолдау көрсетіледі. «Бизнестің жол картасы – 2025» бағдарламасы аясында «Даму» қоры арқылы несие берілмек. 

Кепілсіз 6 пайыз несие және «Даму» қорының 80 пайыз кепілдігі арқылы берілетін несие микрокәсіп иелерін қолдауға бағытталып отыр. Ұлттық экономика министрлігі кәсіпкерлікті дамыту департаментінің директоры Шыңғыс Ахметовтың айтуынша, несие 5-20 млн теңге аралығында ұсынылмақ. 

«Несие кәсіпкерлердің айналым қаражатын толықтыруы және инвестиция алуы үшін тағайындалады. Бұл жобаның басқа бағдарламалардан айырмашылығы субсидия және кепілдендіру жасайтын жеңілдетілген жүйесінің жұмыс істеуі. «Даму» қоры мен банктер нақты жоба бойынша қаржыландыру жасайды. Шілде айының соңында бағдарлама толық пысықталып, кәсіпкерлер қаражат ала бастайды»,– деді Ахметов. 

Қазірдің өзінде «Бизнестің жол картасы – 2025» арқылы қаражат алуға 37 мыңнан астам өтініш келіп түскен. Олардың тек 6 мыңы ғана заңды тұлғалардан түскен. Қалғанының барлығы дерлік жеке тұлғалардың өтініштері. Қаржыландыру кезінде бизнестің қай салаға жататыны маңызды саналмайды. Яғни, шағын және орта бизнестің кез-келген субъектісі жеңілдетілген несие бағдарламасынан үміттене алады.

 «Кез-келген шағын және орта бизнес субъектісі 7 млрд теңгеге дейін ала алады. Осыған дейін бұл 2,5 млрд болған. Шекті мөлшерлеме – 6 пайыз» деді экономист. 

Ахметов кәсіп бастағысы келген жандарды «Даму» қорының ыңғайлы мүмкіндіктерін пайдалануға шақырды. Мәселен, биыл Алматы қаласында 18 жоба қордан 4,6 млрд теңге алып шаруасын дөңгелетіп кеткен. Олардың бәрі дерлік медицина саласы бойынша кәсіп бастаушылар. Негізінен, азаматтар маска, антисептик өндірісі, лабораториялық және дезинфекциялық қызмет көрсету бойынша кәсіпке кіріскен. Жалпы, алғашқы жарты жылдықтың өзінде 229 кәсіпорын медициналық қызмет көрсету бойынша тіркелген. 

«Даму» қоры басшысының орынбасары Фархат Сәрсекеевтің айтуынша, қор алғашқы жарты жылдықта 6,8 мың жобаға 239 млрд теңге қаржы берген. Орталық коммуникациялар қызметінде өткізген брифингте ол сондай-ақ «Қарапайым заттар экономикасы» бағдарламасына да тоқталды. Оның аясында кәсіпкерлер кепілдік алып, сыйақы мөлшерлемесінің бір бөлігін субсидиялай алады. 

    «Бағдарлама жүзеге асқан маусымда 16 млрд теңгеге 139 жобаға қолдау көрсетілді. Екінші деңгейлі банктер тағы 10 жобаны мақұлдады, 21 жоба қарастырылып жатыр. Субсидия жасау бойынша құны 154 млрд теңге болатын 337 жоба көмек алды. «Даму» қоры ТЖ және карантин кезінде бизнес иелерін қолдауды тоқтатқан жоқ. 16 наурыздан бері қор 1294 жобаны қолдап, 101 млрд теңге несие беріпті. 16 наурыз – 25 мамыр аралығында жалпы сомасы 467 млрд теңге болатын 6091 жобаны қайта құрылымдауға мүмкіндік берген» деді қор өкілі.

Қор кәсіпкерлерді қолдауын жалғастыруда. Кәсіп ашып, оған несие немесе кепілдеме аламын, субсидия жасаймын деушілер egov.kz порталы (ЭЦҚ кілтін қалай ашу керек?) және online.damu.kz сайты арқылы өтініш бере алады. 

    Еске салайық, осыған дейін ТЖ мен карантин кезінде бизнесіне зиян келген кәсіпкерлерге жеңілдік жарияланатыны туралы жазған болатынбыз. Ал мына сілтеме арқылы кәсіпкерлерді қолдау бағдарламаларымен таныса аласыздар. 

«Курсивті» кез келген жерде оқыңыз. Бизнес әлеміндегі ең өзекті жаңалықтар Facebook, Telegram және Яндекс.Дзен-де.

banner_wsj.gif

 

Крахмал-сірне зауыты экологиялық сараптамасыз жұмыс істеп келген

Экология министрлігі Жаркенттегі жағымсыз иіс мәселесі шешіледі деп уәде берді

Фото: atameken.kz

Панфилов ауданының орталығы – Жаркент қаласының сасық иіске тұншығып тұрғанына бірнеше жыл болған. Қала маңында орналасқан крахмал-сірне зауытынан шыққан қалдық су сіңбей, одан бүкіл аймаққа күлімсі иіс тарап, қолқаны қабатын. Осы мәселені аудан жұршылығы бірнеше рет көтерген болатын. Жағымсыз иіс тек Жаркент қаласына емес, кейінгі жылдары аудан орталығынан алыс жатқан ауылдарға жеткен еді.  

Енді экология министрлігі жағымсыз иіс мәселесін шешеміз деп уәде беріп отыр.  Жергілікті тұрғындар зауыттың тазарту қондырғыларынан ауаға жағымсыз иіс тарайтынына бірнеше рет шағымданған соң, өңірге экология министрлігінің арнайы комиссиясы барыпты. 

Министрліктің баспасөз қызметінің хабарлауынша, мамандар қоқыс жиналатын сүзу алаңдарын аралаған кезде, іркіліп қалған ластаушы заттардың барын анықтаған. 

«Одан кейін жергілікті қоғамдастық өкілдерімен кездесіп, зауытты араладық. Бар мәселе – оның жеке қоқыс тазарту құрылғысынсыз жобаланғанында. Қалалық, коммуналдық тазарту нысандарына сенген. Алайда, 2018 жылы қалалық коллектор ластаушы заттардың көптігінен, кәсіпорынға өз қызметін ұсынудан бас тартқан. Коллектор ол көлемге шыдас бермеген. Сондықтан компания коллекторын салғанмен, қалдықты тазартпай, тікелей, сүзу алаңына құбыр арқылы жіберген», –  дейді ҚР ЭГТРМ Экологиялық реттеу және бақылау комитетінің төрағасы Зұлфыхар Жолдасов.

Нәтижесінде жүгері өңдеуден қалған қалдықтың көп бөлігі сүзу алаңында быжып,  күлімсі иіс шыға бастаған. Сөйтіп, күкіртсутек шығарындысы пайда болғандықтан, жергілікті тұрғындар бұдан зардап шегіп отыр. 
Экология министрлігі жүргізген тексеру барысында кәсіпорынның тиісті экологиялық сараптамасыз жұмыс істегені белгілі болды. Сол үшін оған айыппұл салынды.

Сонымен қатар, Экология министрлігі кәсіпорынды жақын арада толықтай тексеріп шығу туралы шешім қабылдап отыр. Шығарынды деңгейінің шамадан асуы расталса, онда шығарынды төгуге тыйым салудан бастап, кәіпорынды жабуға дейін мәселе қойылады.

Бұдан бөлек, министрлік кәсіпорын шығарындысы төгілген сүзу алаңын қалпына келтіруді талап етуде.
Ал компания тазарту құрылыстарының салынып жатқанын айтып, оны тамыз айында іске қосу жоспарланып отырғанын хабарлады. Кәсіпорын әзірге өндірісті өз еркімен тоқтата тұрады.

Өз кезегінде, Экология министрлігі кәсіпорынға жергілікті әкімдікпен бірлесіп, тазарту нысандарының құрылысын жүргізіп, аяқтау, одан әрі міндетті түрде сүзілген шығарындыны ғана тастау, сүзу алаңын қалпына келтіру жөніндегі жол картасын әзірлеу туралы ұсыныс айтты. Қабылданған шаралар туралы кейін толығырақ хабарланады.

«Курсивті» кез келген жерде оқыңыз. Бизнес әлеміндегі ең өзекті жаңалықтар Facebook, Telegram және Яндекс.Дзен-де.

banner_wsj.gif

 

#Қазақстандағы коронавирус

Читайте нас в TELEGRAM | https://t.me/kursivkz

Читайте свежий номер

kursiv_uz_banner_240x400.jpg