Skip to main content

Биыл Нұр-Сұлтан қаласында бірінші сыныпқа оқушы қабылдау тәртібі қандай?

Білім басқармасы жаңалықтарды жария етті

Фото: kursiv.kz

22 мамыр күні Нұр-Сұлтан қалалық білім басқармасының басшысы Шолпан Қадырова брифинг өткізіп, оқу маусымының аяқталуына орай жаңалықтармен таныстырды. 

ТҮЛЕК – 2020

«18 мамырдан бастап барлық мектеп дейінгі ұйымдар санитарлық-дезинфекциялық талаптарды сақтай отырып, өз жұмыстарын бірінші кезекте баланы үйге қалдыруға мүмкіндігі жоқ жұмыс істейтін ата-аналар үшін және ата-аналар қалауы бойынша кезекші топтар режимінде қайта бастады. Бүгінде балабақшаларда 4134 бала тәрбиеленуде. 1 маусымнан бастап барлық балабақшалар және қосымша білім беру ұйымдары өз жұмысын штаттық режимде қайта бастайды. Мектепке дейінгі білім беру ұйымдарындағы даярлық топтар балалары 1 тамызға дейін балабақшаға барады. Орта білімге келер болсақ, 25 мамырда барлық мектептерде кезекті оқу жылы аяқталады. Пандемия кезінде мемлекеттік қорытынды емтихандар өткізілмейді. 22 мамыр күні сағат 15:00-де «Балапан» және «Еларна» телеарналарында бітіруші түлектерге арналған кәсіптік бағдар беру бойынша бірыңғай телесабақ көрсетілді. Осы жылы мектеп бітіру шарасы «Біргеміз, түлек 2020» ұранымен өтеді. 

25 мамыр күні барлық мектептерде мүмкіндігінше ата-аналардың, қамқорлық кеңес мүшелерінің, бизнес өкілдерінің, мектепті үздік бітірген бұрынғы түлектердің қатысуымен 1-10 сыныптарға арналған онлайн соңғы қоңырау өткізіледі. Телеарналар арқылы министр Асхат Аймағамбетов түлектерді құттықтайды. 

3 маусым күні 11-сынып түлектері үшін барлық мектептерде аттестат және «Алтын белгі» тапсыру салтанаты өтеді. Іс-шара мектеп аумағында, ашық аспан астында ұйымдастырылады. Мектеп бітірушілердің мектеп формасымен қатысуы қатаң түрде ескертіледі. Салтанатты шарадан соң түлектер аллеясында ағаш отырғызылады. Мектеп әкімшілігіне мектеп бітіру шараларын өткізу кезінде: 
•    Құқық бұзушылыққа; 
•    Мейрамхана мен кафелерде кеш өткізуге жол бермеу тапсырылды. 

Ағымдағы жылы елорданың жалпы білім беретін мектептерін 6515 түлек бітіріп шыққалы отыр. Оның ішінде 6199 оқушы ҰБТ-ға қатысуға өтініш білдірді. ҰБТ 25 маусым мен 5 шілде аралығында барлық санитарлық талаптарды сақтай отыра өткізілетін болады. Ұзақтығы – 3 сағат 50 минут. Екі блоктан тұрады: 3 негізгі, 2 бейіндік пән. ҰБТ сұрақтарында 11 сыныптың 4 тоқсан бағдарламасы қамтылмайды».  


ЖАЗҒЫ ДЕМАЛЫС

«Осы жылы балаларға арналған жазғы демалыс қала сыртындағы лагерлерде ұйымдастырылады. «Арман» туристік сауықтыру кешені, «Боровичок» сауықтыру лагері, «Батыр» шағала лагері және «Тұлпар» киіз үй лагері демалушыларды қабылдайды. Жазғы демалысқа: 
•    Жетім балалар; 
•    Ата-ана қамқорлығынсыз қалған балалар; 
•    Көп балалы және аз қамтылған отбасындағы балалар қабылданады.

Сонымен қатар Оқушылар сарайы жанындағы жазғы демалыс академиясы да жұмыс істейді. Балаларды қорғау күніне орай (1 маусым) «Барлығы балалар үшін» акциясы өтеді. Сол күні Инстаграм әлеуметтік желісінде балалар психологы, ішкі істер органының өкілі, заңгер, білім беру және ғылыми өндірістік өкілдерінің қатысуымен тікелей эфир ұйымдастырылады. Онда ата-аналар мен балалар құқықтық мәселелер бойынша консультация алады. «Ашық спорт» мектеп алаңы ұйымдастырылып, онда бестас, асық ату, тоғызқұмалақ, кір тасын көтеру, қазақ күресі бойынша жарыстар мен шеберлік сабақтары ұйымдастырылады». 

ҚАНДАЙ ҚҰЖАТТАР КЕРЕК?

«Балаларды 1-сыныпқа қабылдау, сыныптан сыныпқа, мектептен мектепке ауыстыру қызметі egov.kz порталы арқылы жүзеге асырылады. Ата-аналар порталдағы «Білім беру» бөлімінде «орта білім беру» бөлімін таңдау арқылы өтініш бере алады және қажетті құжаттарды тіркейді: 
•    Баланың туу туралы куәлігінің көшірмесі; 
•    Бала денсаулығының паспорты; 
•    026/у-3 формасы;
•    063/у нысан бойынша денсаулық жағдайы туралы құжаты;
•    3x4 көлеміндегі фото (2 дана).
Мектептің қабылдау комиссиясы оқуға өтініш берген кезде басқа қосымша құжаттарды талап етпеуі тиіс. Ерекше білім беру қажеттілігі бар балаларды оқуға қабылдау үшін психологиялық, медициналық, педагогикалық консультацияның қорытындысы электронды түрде заңды өкілдерінің келісімімен ұсынылады. Құжаттарды қабылдау 1 маусымда басталады. 
Жаңа оқу жылына дайындық мақсатында 17 тамыздан бастап мектептерде ата-аналар өтініші бойынша ақысыз негізде жазғы мектеп жұмысы ұйымдастырылады. Кез-келген өзгерістер туралы ақпарат ресми сайтта және әлеуметтік желіде хабарланады. Мамандандырылған білім беру ұйымдарына қабылдау емтихандары 18 маусымнан бастап өткізіледі. Құжаттарды қабылдау 15 мамыр – 17 маусым аралығында электронды форматта жүзеге асырылады. Қажетті құжаттар: 
•    Үміткердің ата-анасының немесе өзге де заңды өкілінің өтініші; 
•    Үміткердің туу туралы куәлігінің көшірмесі; 
•    3x4 фото. 
•    Құжаттардың түпнұсқасы талап етілмейді. 

Техникалық және кәсіптік білім беру саласы бойынша: 21 колледже 3602 орынға экономиканың келесі салалары бойынша орналастырылды: 
•    Білім
•    Медицина
•    Фармацевтика
•    Сервис және қызмет көрсету
•    Маркетинг
•    Энергетика
•    Көлік 
•    Өндіру 
•    Монтаждау
•    Пайдалану және жөндеу 
•    Байланыс
•    Телекоммуникация және ақпараттық технологиялар
•    Құрылыс
•    Коммуналдық шаруашылық
•    Экология
  
Колледждерге құжат қабылдау да egov.kz порталы арқылы жүзеге асырылады. 
 

banner_wsj.gif

Енді мұғалімдер артық қағаз бен құжат толтырмайтын болды

Министр жаңа бұйрықтың күшіне енгенін мәлімдеді

Фото:shutterstock.com

Енді қазақстандық мұғалімдер артық-ауыс қағаз бен құжат  толтырып әуре-сарсаңға түспейді. Білім және ғылым министрі Асхат Аймағамбетов педагогтердің шамадан тыс есеп беру мәселесін шешетін бұйрықтың мамыр айынан бастап күшіне енгенін өзінің Фейсбук әлеуметтік желісіндегі парақшасында хабарлаған. Министрдің жазуынша, 2020 жылғы 6 сәуірде қол қойған № 130 бұйрықта орта, техникалық және кәсіптік білім беру ұйымдарының мұғалімдері толтыруға міндетті құжаттардың нақты тізімі көрсетілген. Ведомство басшысы құжаттың маңыздылығын былай түсіндіреді. 

«Бұдан былай мұғалімдерді шамадан тыс есеп беруден арылтатын заң жүзіндегі негіз пайда болды. Енді Министрлік бекіткен нақты тізім бар. «Педагог мәртебесі туралы» Заңға және Әкімшілік кодекске сәйкес, мұғалімдерден бекітілген тізімнен өзге құжаттар бойынша артық есепті талап еткендерді арнайы орган айыппұл түріндегі әкімшілік жауапқа тартуға болады.

96216080_10216203811024231_3807305580951896064_n.jpg

Енді пән мұғалімі күнделікті екі құжатты толтырады. Біріншісі – сынып журналы, екіншісі – сабақ жоспары. Сондай-ақ оқу жылының басында күнтізбелік-тақырыптық жоспарды дайындайды және әр тоқсан соңында критериалдық бағалау бойынша құжаттарды толтырады. Қалған құжаттың еш қажеті жоқ.

Егер мұғалім жас педагогтің тәлімгері болып, сол үшін 17 мың теңгеге жуық үстемеақы алатын болса, онда жас әріптесімен бірлесіп атқарған жұмысы бойынша әдістемелік құжат толтырады.

Егер мұғалім сынып жетекшісі болса, онда оқу жылының басында тәрбие жұмысының жоспарын жасайды, өткізілген ата-аналар жиналысы бойынша электрондық форматта хаттама толтырады, оқушылардың табельдерін толтырады және қажеттілігіне қарай олардың жеке істерін жаңартып отырады.

Мектеп басшысы мен басшының орынбасарлары толтыратын маңызды құжаттардың да нақты тізімі белгіленді, артық құжаттың еш қажеті жоқ» деп жазады министр.

Оның сөзінше, колледж мұғалімдері толтыратын құжаттар тізімі де бекітілген. Олар жыл басында жұмыс істеуге арналған оқу бағдарламасын құрып, күнтізбелік-тақырыптық жоспар жасайды, ал күн сайын сабақ жоспарын әзірлейді. Сондай-ақ теориялық, өндірістік оқыту және жеке сабақтарды есепке алу журналдарын толтырады. Егер педагог куратордың қызметін атқарса, тағы бір құжат қосылмақ. 

96859084_10216203810824226_8710066910328258560_n.jpg

«Шамадан тыс есеп беру көрсеткішін түбегейлі азайтуға қатысты нақты жұмыстар мектепке дейінгі және жоғары білім беру деңгейлері бойынша да жүргізіліп жатыр. Жоғары оқу орындарының оқытушылары да қажетсіз қағаз жүктемесінен арылады. Қазіргі уақытта БҒМ тарапынан нормативтік құжаттарда көрсетілген бақылаудың жүргізілуіне қатысты толтырылатын құжаттар тізімі қайта қаралып жатыр. Басым бөлігін алып тастау туралы шешім қабылданды. Мәселен, кафедраның жұмыс жоспары, комиссияның хаттамасы, қызметтік оқу жоспары сынды құжаттар бізге қажет емес» дейді министр. 

Ол жоғары оқу орындары бойынша бөлек пост жазып, түсіндіретінін айтыпты. 

«Шамадан тыс есеп беруден арылту және құжаттама үлгілерін біріздендіру, ең алдымен, мұғалім жүктемесін жеңілдетеді. Оның шығармашылықпен айналысуына мүмкіндік береді, артық құжат айналымын оңтайландырып, түрлі құжаттар арқылы ақпарат жинау сияқты ескірген тәжірибеден арылтады деген сенімдемін.Барлық білім беру ұйымдарының назарында тек білім алушы болуы тиіс. Педагогтер барлық жұмыс уақытын білім беруге, білім сапасын арттыруға бағыттауы қажет және олардың балалармен жеке айналысуға мүмкіндіктерінің болуы маңызды. Сондықтан Министрлік мұғалімдерді артық жұмыстан арылту бойынша жұмыс жасап жатыр. Бұл ретте мұғалімдерге артылған артық жүктемені азайту бойынша жағдай жасап қана қоймай, педагогтерден жоғары кәсіби біліктілікті және сапалы білім беруді талап ететін боламыз. Қоғамда білім беру сапасының неге ақсап тұрғанын түсіндіру үшін, педагогтердің шамадан тыс есеп беретіні, олардың өзіне тән емес жұмыстарға тартылуы, оқу бағдарламалары мен оқулықтардағы олқылықтар туралы және тағы сол сияқты мәселелер айтылады. Бірақ бұл проблеманың барлығы шешіліп жатыр және бұдан былай да шешімін таба береді» дейді. 

Министр өз мәлімдемесінде мұғалімдердің қызметтік міндетіне кірмейтін мәселелер бойынша есеп талап ету жағдайлары байқалса, онда оны тексерумен министрліктің білім беру сапасын қамтамасыз ету комитетінің аймақтық департаменттері айналысады. 

Еске салсақ, 2019 жылы сәуір айында президент Қасым-Жомарт Тоқаев сол кездегі министр Күләш Шәмшидиноваға мектеп және жоғары оқу орындары мұғалімдерін шамадан тыс есеп беруден арылтуды тапсырған еді. Президент мұғалім мәртебесін көтеру, ғалымдарға қолдау көрсету, әсіресе мемлекеттік тілде зерттеу жүргізіп жатқан гуманитарлық сала өкілдеріне көмек беру туралы тапсырған. Шәмшидинова тұсында тапсырылған міндет Аймағамбетов билігі кезінде жүзеге асты. Ел мұғалімдері осыған дейін шамадан тыс есеп беру, қажетсіз құжат толтыру, өз міндетіне кірмейтін жұмыстарды атқару бойынша қаншама рет шағым білдірген болатын. 
 

banner_wsj.gif

#Коронавирус в Казахстане

Читайте нас в TELEGRAM | https://t.me/kursivkz

Читайте свежий номер

kursiv_kaz.png