Қазақстан АҚШ-та шот ашқан азаматтары туралы ақпарат алып отырады

Жарияланды (жаңартылды )
Мәжіліс Қазақстан мен АҚШ арасындағы салық тәртібін жетілдіру туралы келісімді мақұлдады

Алдағы уақытта қазақстандық мекемелер АҚШ жеке және заңды тұлғаларының есепшоттары мен қаржы операциялары хабарлауға міндетті. Өз кезегінде Қазақстан да өз азаматтары мен компанияларың АҚШ-тағы есепшоттары туралы ақпарат алып отырады. 

Бүгін мәжілісінің жалпы отырысында депутаттар мақұлдаған «Қазақстан Республикасы Үкіметі мен Америка Құрама Штаттары Үкіметі арасындағы халықаралық салық тәртібін жетілдіру жөніндегі келісімді ратификациялау туралы» заң жобасында осындай норма бар. 

Ұлттық экономика министрі Әлібек Қуантыровтың айтуынша, заңға сәйкес, АҚШ қаржылық ұйымдарымен халықаралық іскерлік операциялары бар барлық шетелдік қаржылық ұйымдар АҚШ салық төлеушілерінің шоттары туралы ақпарат беруге міндетті.

«Заң жобасы қаржылық ұйымдардың, атап айтқанда, кредиттік, сақтандыру, брокерлік және басқа да осындай компаниялардың қызметіне қатысты. Осы режімге қосылмаған жағдайда, егер төлемді алушы АҚШ-тағы салық салынатын тұлға, ал аударылған қаражат АҚШ аумағындағы инвестицияға байланысты табыс болса, халықаралық банк аударымдары сомасының 30%-і ұсталуы мүмкін. Келісімге қосылатын қаржы институттары Қазақстанда шот ашқан барлық америкалық жеке және заңды тұлғалар туралы ақпаратты анықтап, ашуға міндетті. Осыған сай, Қазақстанның Келісімге қосылуы АҚШ-та шот ашқан барлық қазақстандық жеке және заңды тұлғалар туралы ақпарат алуға мүмкіндік береді»деді Ә.Қуантыров. 

Министрдің айтуынша бұл мәселе бойынша елдер арасындағы өзара іс-қимыл Қазақстанның бюджетіне оң әсер етуі тиіс. 

Қазақстанның Келісімге сәйкес, орталықтандырылған ақпарат алуды көздейтін үлгіні таңдағанын атап өтті. Бұл оңтайлы үлгіні іске асыру қаржылық жүйеге бақылау жүргізуді сақтауға; Қазақстанның азаматтары мен резиденттері туралы АҚШ-тан ақпарат алуға; ҚР қаржы институттарының әкімшілік шығындарын қысқартуға; Келісім талаптарына байланысты қаржы саласындағы тәуекелдерді азайтуға мүмкіндік береді. 

Бұған дейін АҚШ Қаржы министрлігі ең бай америкалық азаматтардың шамамен 1%-ы жыл сайын 163 миллиард доллар салық төлеуден жалтаратынын хабарлаған. Қаржы министрлігінің мәліметінше, келесі онжылдықта америкалық бюджет 7 трлн долларға дейін жоғалуы мүмкін.

Сондай-ақ оқыңыз